اقتصادی رابطہ کمیٹی نے پنشن فنڈ کے قیام کی منظوری دیدی

اقتصادی رابطہ کمیٹی نے پنشن فنڈ کے قیام کی منظوری دیدی جس کا اطلاق یکم جولائی 2024 سے ہوگا۔

وزیر خزانہ محمد اورنگزیب کی زیر صدارت اقتصادی رابطہ کمیٹی کا اجلاس ہوا جس میں ای سی سی نے پنشن فنڈ کے قیام کی منظوری دیدی۔

اعلامیے کے مطابق ای سی سی نے یکم جولائی 2024 سے سرکاری ملازمین کے لیے کنٹریبیوٹری پنشن اسکیم کی منظوری دی ہے، مسلح افواج کے لیے کنٹریبیوٹری پنشن اسکیم کا اطلاق یکم جولائی 2025 سے ہوگا۔

ای سی سی نے یونیورسل سروس فنڈ کو 11 ارب روپے سے زیادہ کے فنڈز واپس کرنے کی  منظوری دی ہے جبکہ وزارت ریلوے کے زیر التوا واجبات کیلئے بھی 2 ارب روپے کی گرانٹ منظور کی گئی۔

پنشن اسکیم میں مجوزہ ترامیم کی تفصیلات سامنے آگئیں

مجوزہ ترامیم میں کہا گیا ہے کہ سرکاری ملازم میاں اوربیوی کی ریٹائرمنٹ کے بعد کسی ایک کے فوت ہونے پر دونوں کی پنشن ملے گی۔

اقتصادی رابطہ کمیٹی نے ایف بی آر کے غیرملکی منصوبوں کے واجبات کی ادائیگی کیلئے 4 ارب 22 کروڑ روپے سے زائد کی گرانٹ منظور کر لیے جبکہ وزارت منصوبہ بندی کیلئے ساتویں مردم شماری کے واجبات کی ادائیگی کیلئے 7 ارب 98 کروڑ روپے سے زیادہ کی گرانٹ منظور کی گئی۔

اعلامیے کے مطابق سندھ حکومت کے واجبات کی ادائیگی کیلئے 12.1 ارب روپے کی گرانٹ منظور کی گئی جبکہ ملٹری اکاؤنٹس اور اے جی پی آر کی پینشن ادائیگی کیلئے 8 ارب 62 کروڑ روپے سے زیادہ کی گرانٹ منظور کی گئی۔