13 جولائی ، 2024 
'آپ کی شاندار خدمات یاد رہیں گی' بابر اور شاہین کا اینڈرسن کو ریٹائرمنٹ پر خراج تحسین
13 جولائی ، 2024
پاکستان وائٹ بال ٹیم کے کپتان بابر اعظم اور فاسٹ بولر شاہین آفریدی نے انگلش فاسٹ بولر جیمز اینڈرسن کی ریٹائرمنٹ پر انہیں شاندار خراج تحسین پیش کیا ہے۔
اپنی سوئنگ بولنگ سے بیٹرز کو پریشان کرنے والے انگلش فاسٹ بولر جیمز اینڈرسن انٹرنیشنل کرکٹ سے ریٹائر ہوگئے ہیں۔
جیمز اینڈرسن نے ویسٹ انڈیز کے خلاف کیریئر کے آخری ٹیسٹ میں 4 وکٹیں حاصل کیں، انہوں نے مجموعی طور پر 188 ٹیسٹ میں 704 وکٹیں حاصل کیں، وہ 700 سے زائد وکٹیں لینے والے تیسرے جبکہ واحد فاسٹ بولر ہیں۔
جیمز اینڈرسن کی ریٹارمنٹ کے بعد دنیائے کرکٹ سے وابستہ موجودہ اور سابق کھلاڑی انگلش فاسٹ بولر کو زبردست خراج تحسین پیش کررہے ہیں۔
ایسے میں پاکستان وائٹ بال ٹیم کے کپتان بابر اعظم اور شاہین آفریدی نے بھی انگلش بولر کو خراج تحسین پیش کیا۔
بابر اعظم نے سوشل میڈیا پر بیان جاری کرتے ہوئے کہا کہ 'جمی آپ کی سوئنگ کا سامنا کرنا ایک اعزاز تھا، خوبصورت کھیل ایک عظیم کھلاڑی کو مس کرے گا، آپ کی شاندار خدمات یاد رہیں گی، بطور عظیم کھلاڑی آپ کی عزت ہمیشہ برقرار رہے گی'۔
اس کے علاوہ شاہین آفریدی نے لکھا کہ 21 سال تک اس کھیل کی خدمت کرنے پر جیمز اینڈرسن آپ کا شکریہ، آپ ہم جیسے کئی کھلاڑیوں کے لیے متحرک ہونے کا سبب بنے، آپ کے اگلے سفر کے لیے نیک خواہشات ہیں۔
