18 جولائی ، 2024 
عمران خان اور بشریٰ بی بی نے توشہ خانہ کے نئے ریفرنس میں گرفتاری چیلنج کردی
18 جولائی ، 2024
اسلام آباد: عمران خان اور بشریٰ بی بی نے توشہ خانہ کے نئے ریفرنس میں گرفتاری اسلام آباد ہائیکورٹ میں چیلنج کردی۔
عمران خان اور ان کی اہلیہ بشریٰ بی بی کی جانب سے بیرسٹر سلمان صفدر اور خالد یوسف نے اسلام آباد ہائیکورٹ میں درخواست دائر کی جس میں چیئرمین نیب، ڈی جی نیب اور دیگر نیب افسران کو فریق بنایا گیا ہے۔
درخواست میں مؤقف اختیار کیا گیا ہے کہ عمران خان اور بشریٰ بی بی شامل تفتیش ہوئے،گرفتاری کی ضرورت نہیں، اعلیٰ عدلیہ نے بار بار کہا صرف نامزد ہونے پر کسی بھی شخص کو فوراً گرفتار نہ کیا جائے لہٰذا گرفتاری اعلیٰ عدلیہ کے احکامات کی بھی خلاف ورزی ہے۔
درخواست میں کہا گیا ہے کہ سیاسی مخالفت پر وفاقی اور پنجاب حکومت عمران خان اور بشریٰ بی بی کو لمبے عرصے تک زیرحراست رکھنا چاہتے ہیں، دونوں ملزمان کو اسلام آباد ہائیکورٹ میں درخواست زیرسماعت ہونے کے دوران گرفتار کرنا بدنیتی کا ثبوت ہے۔
درخواست میں استدعا کی گئی ہےکہ دونوں کی گرفتاری غیرقانونی ہے، رہا کرنے کے احکامات دیے جائیں اور آئندہ کسی بھی مقدمے میں گرفتاری اسلام آباد ہائیکورٹ کے احکامات سے مشروط کی جائے جب کہ حکومتی اداروں کو عدالتی احکامات کے بغیر بانی پی ٹی آئی اور بشریٰ بی بی کی گرفتاری سے روکا جائے۔
مزید خبریں :
کراچی میں خلع کیسز دائر کرنے کی تعداد دگنا ہوگئی
2 گھنٹے پہلے
لاہور ہائیکورٹ کا عمر قید کے ملزم کو رہا کرنے کا حکم
8 گھنٹے پہلے
