پی سی بی کا گلوبل ٹی ٹوئنٹی کیلئے بابر، رضوان اور شاہین کو این او سی جاری نہ کرنے کا فیصلہ

پاکستان کرکٹ بورڈ (پی سی بی) نے کینیڈا میں ہونے والی گلوبل ٹی ٹوئنٹی کیلئے قومی کرکٹ ٹیم کے کپتان بابر اعظم، محمد رضوان اور شاہین آفریدی کو این او سی جاری نہ کرنے کا فیصلہ کرلیا۔

پی سی بی کی جانب سے جاری اعلامیے میں کہا گیا ہے کہ گلوبل ٹی ٹوئنٹی کیلئے پی سی بی کو بابر اعظم، محمد رضوان اور شاہین آفریدی کی جانب سے این او سی کی درخواستیں موصول ہوئی تھیں۔

اعلامیے میں کہا گیا ہےکہ پاکستان کرکٹ بورڈ نے پاکستان کرکٹ ٹیم کی غیرمعمولی مصروفیت، ان تینوں کھلاڑیوں اور سلیکشن کمیٹی سے مشاورت کے بعد ان تینوں کرکٹرز کو این او سی جاری نہ کرنے کا فیصلہ کیا ہے۔ 

بورڈ کے مطابق اگست 2024 سے مارچ 2025 کے عرصے میں پاکستان کرکٹ ٹیم کو آئی سی سی ورلڈ ٹیسٹ چیمپیئن شپ کے 9 ٹیسٹ کھیلنے ہیں، اس کے علاوہ آئندہ سال آئی سی سی چیمپیئنز ٹرافی بھی کھیلنی ہے جس کا انعقاد پاکستان میں ہونا ہے، اس طرح پاکستان اس عرصے میں 9 ٹیسٹ، 14 ون ڈے انٹرنیشنل اور 9 ٹی ٹوئنٹی انٹرنیشنل کھیلے گا لہٰذا تینوں کرکٹرز تینوں فارمیٹ کے کرکٹرز ہیں اور پاکستان کو آئندہ 8 ماہ میں ان کی خدمات درکار ہوں گی۔

گلوبل ٹی ٹوئنٹی کینیڈا کیلئے بابر، شاہین اور رضوان کو اجازت نہ ملنے کا امکان

کینیڈا کی لیگ کسی سیریز سے متصادم نہ ہونے کے باوجود تینوں کھلاڑیوں کو این او سی ملنے کا امکان نہیں ہے: ذرائع

پی سی بی کے مطابق پاکستان کرکٹ بورڈ کی ورک لوڈ منیجمنٹ پالیسی کے پیش نظر پاکستان کرکٹ اور کھلاڑیوں کے بہترین مفاد میں ہے کہ یہ کھلاڑی کینیڈا میں ہونے والے ایونٹ کو چھوڑ دیں تاکہ وہ سیزن کیلئے اپنی بہترین ذہنی اور جسمانی حالت میں ہوں جس کا آغاز بنگلا دیش کے خلاف دو ٹیسٹ میچوں کی سیریز سے ہوگا۔

اس سے قبل پی سی بی نے اسی بنیاد پر نسیم شاہ کو دی ہنڈریڈ کیلئے این او سی جاری نہیں کی تھی۔

پی سی بی کے مطابق آصف علی، افتخار احمد، محمد عامر اور محمد نواز کیلئے این او سی کی منظوری دے دی گئی ہے، چاروں کھلاڑی بنیادی طور پر وائٹ بال کے کرکٹرز ہیں تاہم افتخار احمد اور محمد نواز سینٹرل کنٹریکٹ یافتہ کرکٹرز ہیں۔