دنیا

مکیش امبانی نے بیٹے اننت کی شادی سے کیسے 25 ہزار کروڑ کمائے؟

21 جولائی ، 2024

مکیش امبانی نے بیٹے اننت کی شادی سے کیسے 25 ہزار کروڑ کمائے؟ — اننت امبانی کی شادی میں 5 ہزار کروڑ بھارتی روپے خرچ ہوئے ہیں، بھارتی میڈیا رپورٹس— فوٹو:فائل

بھارت کے امیر ترین بزنس مین مکیش امبانی کی دولت میں بیٹے اننت امبانی کی شادی کے دنوں میں 25 ہزار کروڑ بھارتی روپے کا اضافہ ہوگیا۔

مکیش امبانی کے بیٹے اننت امبانی شادی کی تقریبات 7 ماہ جاری رہیں اور گزشتہ دنوں اننت امبانی رشتہ ازدواج میں منسلک ہوئے۔

12 جولائی کو ہونے والی شادی کی تقریبات 14 جولائی تک جاری رہیں جس میں بھارتی وزیر اعظم نریندر مودی، سابق برطانوی وزیر اعظم ٹونی بلیئر، سامسنگ کے چیئرمین لی جائے ینگ، بالی وڈ اور ہالی وڈ کی معروف شخصیات نے شرکت کی۔

بھارتی میڈیا رپورٹس کے مطابق اننت امبانی کی شادی میں 5 ہزار کروڑ بھارتی روپے خرچ ہوئے ہیں تاہم اس کے باوجود مکیش امبانی کی دولت میں کمی نہیں ہوئی بلکہ ریکارڈ اضافہ ہوگیا۔

یہ بھی پڑھیں

بھارتی میڈیا رپورٹس میں کہا گیا ہے کہ نئی بہو رادھیکا مرچنٹ کے آتے ہی سسر مکیش امبانی کی دولت میں 3 ارب ڈالرز یعنی 25 ہزار کروڑ بھارتی روپے کا اضافہ ہوگیا۔

بلومبرگ کی رپورٹ کے مطابق 5 جولائی کو امبانی کے اثاثوں کی مالیت 118 ارب ڈالرز تھی تاہم 12 جولائی کو اثاثے 121 ارب ڈالرز ہوگئے اور وہ ایک درجہ ترقی کرتے ہوئے دنیا کے امیر ترین افراد کی فہرست میں 11 ویں نمبر پر آگئے۔

بھارتی میڈیا رپورٹس میں بتایا گیا ہے کہ 12 جولائی کو بیٹے کی شادی کے دن ریلائنس انڈسٹریز کے شیئرز کی قیمت میں ایک فیصد اضافہ ہوا جس کے باعث ان کے اثاثے بھی بڑھ گئے جبکہ گزشتہ ایک ماہ میں ان کے شیئرز کی قیمت میں 6 فیصد سے زائد اضافہ ہوا تھا۔