کملاہیرس کو صدارتی امیدواربنانےکی کوشش

ڈیموکریٹ پارٹی نے کملا ہیرس کو صدارتی امیدوار یقینی طور پر بنانے کے لیے امریکا بھر میں اپنے ڈیلی گیٹس کو ای فارم جاری کیے ہیں جس میں ان سے کہا گیا ہے کہ وہ کس صدارتی امیدوار کو نامزد کرنا چاہتے ہیں؟ 

پارٹی کا خیال ہے کہ اگر مجموعی ڈیموکریٹ ڈیلی گیٹس میں سے 10 فیصد ڈیلی گیٹس یعنی امریکا بھر سے اگر تقریباً 200 ڈیلی گیٹس نے کملا ہیرس کی حمایت کردی تو کملا ہیرس کو صدارتی امیدوار بنانا نسبتاً  آسان ہوجائےگا۔

کملا ہیرس کا تعلق کیلی فورنیا سے ہے تاہم اس ریاست میں بھی بعض سینئر ڈیموکریٹ اراکین نہیں چاہتے کہ کملا ہیرس امیدوار بنیں اس لیے ابھی یہ نہیں کہا جاسکتا کہ اگر کملاہیرس نے 10 فیصد ڈیلی گیٹس یعنی 200 ڈیلی گیٹس کی حمایت حاصل کربھی لی تو وہ 100 فیصد صدارتی امیدوار بن جائیں گی، یہ عین ممکن ہے کہ 19 اگست کو ہونے والے ڈیموکریٹ کنونشن کو اوپن کنونشن ڈکلیئر کرایا جائے تاکہ کوئی اور مضبوط امیدوار بھی میدان میں آسکے۔

کملا ہیرس کو الیکشن میں شکست دینا بائیڈن کے مقابلے میں اور آسان ہوگا: ٹرمپ

امریکی صدر جو بائیڈن نے 2024 کے امریکی صدارتی انتخابات کی دوڑ سے دستبردار ہونے کا اعلان کردیا ہے

اتنا واضح ہے کہ اگر 10 فیصد ڈیلی گیٹس نے کملا ہیرس کو صدارتی امیدوار بنانے کی حمایت کردی تو افراتفری کا شکار ڈیموکریٹ پارٹی میں کچھ ٹھہراؤ آجائے گا اور  سمت متعین ہونا شروع ہوجائے گی، اس صورت میں کملا ہیرس اپنا نائب صدارتی امیدوار بھی نامزدکرنے کی پوزیشن میں آجائیں گی۔

ابھی چونکہ بالکل ابتدائی مرحلہ ہے اس لیے یہ واضح نہیں ہے کہ نائب صدارتی امیدوار کون ہوگا اور نہ ڈیلی گیٹس کو یہ بتایا گیا ہےکہ کملا ہیرس صدارتی امیدوار کی نامزدگی حاصل کرلیتی ہیں تو وہ اپنا نائب کسے بنائیں گی تاہم اگر آج یہ 200 ڈیلی گیٹس فارم بھر کے اپنی ڈیموکریٹ پارٹی کو جمع کرادیتے ہیں تو پھر کملا ہیرس کےلیے دوسرا مرحلہ نائب صدارتی امیدوار کو سامنے لانے کا ہوگا۔

جیو نیوز، جنگ گروپ یا اس کی ادارتی پالیسی کا اس تحریر کے مندرجات سے متفق ہونا ضروری نہیں ہے۔