Print Story
X
گیلپ نے گذشتہ برس ان سوالات پر مشتمل ایک سروے کیا تھا لیکن اس کے نتائج سوشل میڈیا پر کئے جانے والے دعوؤں سے بالکل مختلف تھے۔
22 جولائی ، 2024
سوشل میڈیا پر شیئر کی گئی ایک وائرل پوسٹ میں الزام لگایا گیا ہے کہ گیلپ پاکستان کے حالیہ سروے کے مطابق 94 فیصد پاکستانی ملک چھوڑنا چاہتے ہیں۔
یہ دعویٰ بالکل جھوٹا ہے۔ گیلپ پاکستان نے ایسا کوئی سروے شائع نہیں کیا۔
10 جولائی کو ایک صارف نے X، جسے پہلے ٹوئٹر کے نام سے جانا جاتا تھا، پر دعویٰ کیا کہ گیلپ پاکستان کے تازہ ترین سروے کے مطابق تقریباً 94 فیصد پاکستانی ملک چھوڑنا چاہتے ہیں۔
صارف نے حکومت کا مذاق اڑاتے ہوئے اپنی پوسٹ میں مزید لکھا کہ ”شکریہ آئین کو روندنے والو، 2 سال میں پورے ملک کو خود سے متنفر کر دیا۔ “
اس نیوز آرٹیکل کے شائع ہونے تک اس پوسٹ کو 2 ہزار 800 مرتبہ شیئر اور 7ہزار 600 سے زیادہ بار لائیک، جبکہ اس پوسٹ کو 82 ہزار مرتبہ دیکھا جا چکا ہے۔
اسی دن ایک اور X صارف نے بھی اسی قسم کا دعویٰ کیا۔ صارف نے اپنی پوسٹ میں لکھا کہ ”تازہ ترین گیلپ سروے کے مطابق %94 پاکستانی مُلک چھوڑنے کے خواہشمند ہیں، جبکہ دورِ عمران خان میں %100 اوورسیز پاکستانی مُلک واپس آنے کے خواہشمند تھے، یہ اُس وقت ہوتا ہے جب قیادت ایماندار اور قابلِ اعتماد ہو۔“
اس پوسٹ کو اب تک 73ہزار سےزائد مرتبہ دیکھا جا چکا ہے۔
اس طرح کے دعوے میڈیا کے اداروں کی طرف سے بھی شیئر کئے گئے۔
گیلپ پاکستان کے ایگزیکٹو ڈائریکٹر بلال اعجاز گیلانی نے آن لائن وائرل ہونے والے دعووں کو ”جعلی“ قرار دیا ہے۔
انہوں نے ٹیلی فون پر وضاحت کرتے ہوئے جیو فیکٹ چیک کو بتایا کہ ”ہم نے یہ سروے نہیں کیا ہے۔“
بلال اعجاز گیلانی کا مزید کہنا تھا کہ ان کی تنظیم نے گذشتہ برس ان سوالات پر مشتمل ایک سروے کیا تھا لیکن اس کے نتائج سوشل میڈیا پر کئے جانے والےدعوؤں سے بہت مختلف تھے۔
19 دسمبر 2023 کو شائع ہونے والے گیلپ پاکستان کے ایک سروے سے معلوم ہوتا ہے کہ آدھے سے زیادہ پاکستانی، خاص طور پر 56 فیصد جواب دہندگان جو ملک چھوڑنا چاہتے تھے، نے پاکستان میں کم آمدنی کو ہجرت کی خواہش کی سب سے اہم وجہ قرار دیا۔
2023 کا سروے یہاں دیکھا جا سکتا ہے۔
اسی طرح کا ایک اور سروے 18دسمبر 2023 کو بھی شائع ہوا، جس میں بتایا گیا تھا کہ 71 فیصد پاکستانیوں کا ماننا ہے کہ پاکستان میں حالات کتنے ہی خراب کیوں نہ ہوں وہ کسی دوسرے ملک نہیں جائیں گے۔ یہ سروے بھی یہاں دیکھا جا سکتا ہے۔
پس، گیلپ پاکستان کی جانب سے کوئی ایسا سروے شائع نہیں کیا گیا جس سے یہ معلوم ہوا ہو کہ 94 فیصد پاکستانی بیرون ملک جانے کے خواہشمند ہیں۔ گیلپ انٹرنیشنل کی طرف سے بھی ایسے کسی بھی سروے کے نتائج کو شیئر نہیں کیا گیا ۔
ہمیں@GeoFactCheck پر فالو کریں۔
اگرآپ کو کسی بھی قسم کی غلطی کا پتہ چلے تو [email protected] پر ہم سے رابطہ کریں۔
