26 جولائی ، 2024
بھارت کے سابق اسپن بولر ہربھجن سنگھ نے چیمپئنز ٹرافی کے لیے بھارتی ٹیم کے پاکستان آنے سے متعلق زہر اگلنا شروع کردیا۔
بھارتی میڈیا کے مطابق سابق کرکٹر نے بھارتی ٹیم کی ٹورنامنٹ میں شرکت اور پاکستان جانے کی تصدیق کرنے سے پہلے حکومت سے منظوری لینے کے بھارتی بورڈ کے فیصلے کی حمایت کی۔
حال ہی میں بھارتی میڈیا سے بات کرتے ہوئے ہربھجن سنگھ سے جب بھارتی ٹیم کے پاکستان جانے کے حوالے سے سوال کیا گیا تو انہوں نے کہا کہ مجھے کوئی اس بات کا جواب دے دے کہ بھارتی ٹیم پاکستان کیوں جائے؟
انہوں نے کہا پاکستان میں حفاظت کے خدشات ہیں، وہاں کے حالات ایسے ہیں کہ تقریباً ہر روز حادثات ہوتے رہتے ہیں، وارداتیں ہوتی ہیں۔
ان کا کہنا تھا کہ میں نہیں سمجھتا کہ وہاں جانا بھارتی ٹیم کے لیے محفوظ ہے اور بی سی سی آئی کا مؤقف بالکل درست ہے، ہمارے کھلاڑیوں کی حفاظت سے زیادہ کوئی چیز اہم نہیں ہے، میں کرکٹ بورڈ کے مؤقف کی حمایت کرتا ہوں۔
بھارتی میڈیا کے مطابق کرکٹ بورڈ نے اس معاملے پر تبصرہ کرنے سے گریز کیا اور کہا ہے کہ حکومت ٹیم کے پاکستان جانے سے متعلق فیصلہ کرے گی۔
واضح رہے کہ آئی سی سی چیمپئنز ٹرافی فروری 2025 میں پاکستان میں شیڈول ہے۔