26 جولائی ، 2024 
'میرا اصل نام ریشم نہیں' اداکارہ کا دہائیوں بعد انکشاف، نام تبدیلی کی وجہ بھی بتادی
26 جولائی ، 2024
ماضی کی معروف فلم اسٹار ریشم نے حال ہی میں انکشاف کیا کہ ان کا اصل نام ریشم نہیں بلکہ کچھ اور ہے۔
نجی ٹی وی چینل کے شو میں ریشم نے اپنے کیرئیر سمیت ذاتی زندگی اور سماجی کاموں کے حوالے سے بات چیت کی۔
ریشم نے بتایا کہ ان کا تعلق پنجاب کے شہر فیصل آباد سے ہے، شوبز کیرئیر شروع ہونے سے پہلے ہی میرا خاندان لاہور منتقل ہوگیا تھا۔
کیرئیر کی شروعات سے متعلق انہوں نے بتایا کہ سرکاری ٹی وی کے ڈراموں میں مختصر کردار کیا کرتی تھی اور وہیں سے کیرئیر کا آغاز ہوا، بعدازاں مرکزی کردار ملنے لگے۔
اداکارہ نے دوران انٹرویو انکشاف کیا کہ ان کا اصل نام ریشم نہیں بلکہ 'صائمہ' ہے جو انہوں نے اس لیے تبدیل کیا تھا کیونکہ شوبز میں پہلے سے ہی اس نام کی اداکارہ تھیں جو مقبول تھیں لہٰذا انہوں نے اپنا نام بدلنا بہتر سمجھا۔
ریشم نے بتایا کہ جب ان کا پہلا ڈرامہ پی ٹی وی پر نشر ہوا تو اس سے قبل ہی ان کی بڑی بہن نے ان کا نام تبدیل کیا اور بڑے غور و فکر کے بعد انہیں ریشم نام دیا اور پہلےہی ڈرامے میں ان کا نام ریشم لکھا گیا۔
