27 جولائی ، 2024 
اداکار محمود اسلم زندگی کا تلخ واقعہ بتاتے ہوئے رو پڑے
27 جولائی ، 2024
اپنی شاندار اداکاری سے سب کے چہروں پر ہنسی بکھیرنے والے اداکار محمود اسلم ایک نجی ٹی وی شو میں اپنی زندگی کا تلخ واقعہ بتاتے ہوئے رو پڑے۔
پروگرام میں گفتگو کرتے ہوئے سینئر اداکار محمود اسلم نے بتایا کہ میں صرف 24 سال کا تھا جب میری پہلی اولاد بیٹی ہوئی تھی جوقبل از وقت پیدا ہونے کے سبب مر گئی تھی، اسپتال انتظامیہ نے میری بچی مجھے لا کر دے دی جو سفید کپڑے میں لپٹی ہوئی تھی اور مجھے کچھ سمجھ نہیں آرہا تھا میں کیا کروں، ایسا لگ رہا تھا میں دنیا میں اکیلا ہوں۔
انہوں نے کہا کہ اس دور میں موبائل فون نہیں ہوا کرتے تھے تو میں نے لینڈ لائن پر کال کرکے گھر والوں کو اطلاع دی اور یہ وہ واقعہ ہے جو میں کبھی نہیں بھول سکتا کیونکہ وہ پہلی اولاد تھی جسے کھو چکے تھے۔
محمود اسلم نے بتایا کہ ایک یہ اور ایک اپنی ماں کے انتقال پر بھی بہت دکھ ہوا، میری ماں گھر میں نچلے کمرے میں رہتی تھیں جب کہ میرا کمرا اوپری منزل پر تھا اور میں کام میں مصروف رہتا تو وہ مجھے کہا کرتی تھیں کہ پتا نہیں مرتے وقت میں تمہیں دیکھ بھی سکوں گی یا نہیں۔
اداکار نے مزید بتایا کہ ایک دن میری ماں کی حالت بگڑی وہ آخری اسٹیج تھی تو میں اپنی والدہ کے کمرے میں جیسے ہی گیا تو انہوں نے اپنا ہاتھ اٹھایا اور میں ان کے گلے لگ گیا۔
مزید خبریں :
کینسر میں مبتلا اداکارہ انجلین ملک نے دعا کی درخواست کردی
11 مارچ ، 2025
