27 جولائی ، 2024 
190 ملین پاؤنڈ کیس، عدالت نے عمران خان کے وکلا کو گواہوں پر جرح کا آخری موقع دے دیا
27 جولائی ، 2024
اسلام آباد کی احتساب عدالت نے پاکستان تحریک انصاف کے بانی عمران خان اور ان کی اہلیہ بشریٰ بی بی کے خلاف 190 ملین پاؤنڈ کیس میں وکلا صفائی کو استغاثہ کے دو گواہوں پر جرح مکمل کرنے کیلئے آخری موقع دے دیا۔
اسلام آباد کی احتساب عدالت کے جج محمد علی وڑائچ نے بانی پی ٹی آئی اور بشریٰ بی بی کے خلاف 190 ملین پاؤنڈ کیس کی گزشتہ روز 26 جولائی کو ہونے والی سماعت کا تحریری حکم نامہ جاری کر دیا۔
حکم نامے میں کہا گیا ہے کہ 26 جولائی کو 10:40 پر کیس کال ہوا نیب کے گواہ موجود تھے لیکن بانی پی ٹی آئی کی جانب سے کوئی نہیں تھا، کیس 11:00 بجے تک ملتوی کردیا گیا۔
تحریری حکم کے متن کے مطابق سوا گیارہ بجے کیس دوبارہ کال ہوا، بانی پی ٹی آئی اور بشریٰ بی بی کو لایا گیا، خالد یوسف ایڈووکیٹ نے پیش ہو کر کہا کہ سینیئر وکلا راستے میں ہیں۔
عدالت نے حکم دیاکہ بانی پی ٹی آئی اور بشریٰ بی بی کے وکلا کو آخری موقع دیا جاتا ہے، ان کے وکلا 30 جولائی کو جرح مکمل کریں، استغاثہ کے گواہ عمیر احمد اور میاں عمر ندیم اپنے بیان ریکارڈ کرانے کے پابند ہیں۔
