دہشتگرد قابضین کو ہنیہ کی شہادت کے عمل پر پچھتانے پر مجبور کردینگے: ایرانی صدر

 تہران: ایرانی صدر مسعود پزشکیان نے اسماعیل ہنیہ کی شہادت پر ردعمل میں کہا ہےکہ ایران دہشتگرد قابضین کو اس شہادت کے بزدلانہ عمل پر پچھتانے پر مجبور کردے گا۔

عرب میڈیا کے مطابق ایرانی صدر  نے اپنے بیان میں کہا کہ ایران اپنی علاقائی سالمیت اور وقار کا دفاع کرے گا، ایران دہشتگرد قابضین کو اسماعیل ہنیہ کی شہادت کے بزدلانہ عمل پر پچھتانے پر مجبور کردے گا۔ 

مسعود پزشکیان نے مزید کہا کہ آج ایران مزاحمت کے راستے کے قابل فخر اور مستقل ساتھی کی شہادت کا نوحہ کررہا ہے، کل میں نے اسماعیل ہانیہ کے فاتحانہ ہاتھوں کو بلند کیا تھا اور آج میں اسے اپنے کندھے پر رکھ کر دفناؤں گا۔

دوسری جانب ایرانی وزارت خارجہ نے کہا کہ اسماعیل ہنیہ کا خون کبھی رائیگاں نہیں جائے گا، ہنیہ کی شہادت تہران فلسطین تعلق کو مزید مضبوط کرے گی، تہران اور فلسطین کا تعلق گہرا اور نا ٹوٹنے والا تعلق ہے۔ 

علاوہ ازیں ایرانی میڈیا کے مطابق اسماعیل ہنیہ کو تہران میں ان کی رہائش گاہ پرفضائی حملہ کرکے نشانہ بنایا گیا جب کہ اس  کارروائی کی تفصیلات جاننےکے لیے حکام مزید تحقیقات کررہے ہیں۔ 

تہران میں ہونیوالے اسرائیلی حملے میں حماس سربراہ اسماعیل ہنیہ شہید

اسماعیل ہنیہ ایرانی صدر کی تقریب حلف برداری میں شرکت کیلئے تہران میں موجود تھے، ان کی قیام گاہ پر حملہ کرکے انہیں شہید کیا گیا: ایرانی ٹی وی

اسماعیل ہنیہ پاسداران انقلاب کے گیسٹ ہاؤس میں مقیم تھے جسے میزائل سے نشانہ بنایا گیا: اسرائیلی میڈیا

اسرائیلی فوج نے حماس کے سیاسی رہنما کی ہلاکت پر تبصرہ کرنے سے انکار کیا ہے