02 اگست ، 2024 
بائیڈن کا اسرائیلی وزیراعظم سے رابطہ، خطے میں اسرائیل کیلئے مزید فوجی بھیجنے کا فیصلہ
02 اگست ، 2024
امریکی صدر کی جانب سے اسرائیلی وزیراعظم سے ٹیلیفونک رابطے کے بعد اسرائیل کیلئے خطے میں مزید فوجی بھیجنے کا فیصلہ کرلیاگیا۔
امریکی صدر جوبائیڈن اور نائب صدر کملا ہیرس نے اسرائیلی وزیراعظم نیتن یاہو سے ٹیلیفونک رابطے میں اسرائیل کو بیلسٹک میزائلوں اور ڈرون حملوں سے بچانے کیلئے مزید دفاعی سامان بھیجنے پر بھی بات چیت کی گئی۔
وائٹ ہاوس کا کہنا ہے کہ ایران، حماس، حزب اللہ اور حوثیوں سے اسرائیل کا تحفظ یقینی بنایا جائے گا۔
واضح رہے کہ ایران اور لبنان میں اسرائیلی حملوں کے بعد خطے میں بڑھتی کشیدگی کے پیش نظر امریکا نے روزویلٹ نامی جنگی بحری بیڑہ بھی خلیج فارس میں پہنچا دیا ہے۔
امریکی اخبار کے مطابق بحری بیڑے کے ساتھ 6 میزائل بردار جہاز بھی موجود ہیں جبکہ مشرقی بحیرہ روم میں 5 امریکی جنگی بحری جہاز پہلے سے ہی تعینات ہیں۔
غیر ملکی میڈیا کے مطابق امریکی جاسوس طیاروں کی شام، لبنان اور اسرائیل کی ساحلی پٹیوں پر پرواز کا سلسلہ بھی جاری ہے۔
عرب میڈیا کے مطابق امریکی بحریہ کے جاسوس طیاروں نے شام، لبنان اور اسرائیل کی ساحلی پٹی پر 4 گھنٹے تک پرواز کی اور انٹیلی جنس ڈیٹا جمع کیا۔
