12 اگست ، 2024 
نوح دستگیر اولمپکس میں شرکت کیوں نہ کر سکے؟ کامن ویلتھ کے گولڈ میڈلسٹ نے وجہ بتا دی
12 اگست ، 2024
کامن ویلتھ گیمز میں پاکستان کیلئے سونے کا تمغہ جیتنے والے ویٹ لفٹر نوح دستگیر بٹ کا کہنا ہے کہ پاکستان کی ویٹ لفٹنگ فیڈریشن چاہتی ہی نہیں تھی کہ میں اولمپکس کیلئے کوالیفائی کروں۔
جیو نیوز کے پروگرام نیا پاکستان میں گفتگو کرتے ہوئے نوح دستگیر بٹ کا کہنا تھا کہ ویٹ لفٹنگ فیڈریشن ذاتی رنجش کی وجہ سے نہیں چاہتی تھی کہ میں اولمپکس کے لیے کوالیفائی کروں۔
نوح دستگیر بٹ نے شکوہ کیا کہ کامن ویلتھ گیمز جیتنے کے بعد انہیں سہولیات دی گئیں، اس سے پہلے کچھ نہیں ملا۔
کامن ویلتھ گیمز کے گولڈ میڈلسٹ کا کہنا تھا فیڈریشن والے میڈل جیتنے کے بعد کہتے تھے کہ انہیں کریڈیٹ دو جبکہ ساری محنت میرے والد کی تھی۔
یاد رہے کہ نوح دستگیر بٹ نے 2022 میں برطانیہ میں ہونے والے دولت مشترکہ کھیلوں میں پاکستان کے لیے گولڈ میڈل جیتا تھا۔
نوح دستگیر بٹ نے 109 کلو گرام سے زیادہ وزن کے ویٹ لفٹرز کے مقابلے میں مجموعی طور پر 405 کلوگرام وزن اٹھا کر نہ صرف گولڈ میڈل حاصل کیا تھا بلکہ کامن ویلتھ گیمز کا نیا ریکارڈ بھی قائم کیا تھا۔
