بعض سرکاری افسران کی تنخواہ میں اضافے کے بعد انکم ٹیکس سے تنخواہ کم ہونے کا انکشاف

اسلام آباد: نئے مالی سال کے بجٹ میں بعض سرکاری افسران کی تنخواہ میں اضافے کے باوجود ٹیکس کٹوتی کے بعد تنخواہ میں کمی کا انکشاف ہوا ہے۔ 

رواں مالی سال کے بجٹ میں اعلیٰ سرکاری افسران کی تنخواہوں میں 20 فیصد اضافے کے باوجود انکم ٹیکس کی کٹوتی کے بعد بعض افسران کی تنخواہوں میں کمی کا انکشاف ہوا ہے۔ 

گریڈ 20کے ایک افسر نے نام ظاہر نہ کرنے کی شرط پر بتایا کہ تنخواہ میں ماہانہ 43240 روپے اضافہ ہوا مگر نئی شرح سے انکم ٹیکس کٹوتی کی وجہ سےتنخواہ 272 روپے کم ہوگئی۔

انکم ٹیکس کیلکولیٹر، آپ کی تنخواہ سےکتنا ٹیکس کٹےگا؟

50 ہزار روپے ماہانہ آمدن والے افراد انکم ٹیکس سے مستثنیٰ قرار دیے گئے ہیں۔

افسر نے بتایا کہ تنخواہوں میں 20 فیصد اضافے سے قبل اس کی گراس تنخواہ 5 لاکھ 26ہزار 279روپے تھی جو  بڑھ کر 5 لاکھ 69 ہزار 519 روپے ہوگئی اور تنخواہ میں ماہانہ 43ہزار 240 روپے کا اضافہ ہوا، پہلے ان کی تنخواہ پر ماہانہ انکم ٹیکس 77 ہزار روپے کی کٹوتی ہوتی تھی مگر اب نئی شرح سے ان کی تنخواہ سے انکم ٹیکس کی کٹوتی ایک لاکھ 20 ہزار 512 روپے کی گئی ہے۔

 انہوں نے کہا کہ اس طرح میری تنخواہ میں ماہانہ اضافہ 43 ہزار 240 روپے کے مقابلے میں 43 ہزار 512 روپے زیادہ انکم ٹیکس کٹوتی ہوتی ہے جس وجہ سے تنخواہ میں گزشتہ تنخواہ کے مقابلے میں 272 روپے کم ہوگئی ہے۔