16 اگست ، 2024 
پاکستان
وفاقی حکومت کے وکیل متعلقہ حکام سے ہدایات لے کر 12 بجے پیش ہوں: جسٹس شکیل احمد۔ فوٹو فائل
انٹرنیٹ کی بندش کا کیس: لاہور ہائیکورٹ کا وفاق کے وکیل کو ہدایات کیساتھ پیش ہونیکا حکم
16 اگست ، 2024
لاہور ہائیکورٹ نے ملک میں انٹرنیٹ کی بندش کے کیس میں وفاق کے وکیل کو سرکاری حکام سے ہدایات لیکر 12 بجے تک پیش ہونے کا حکم دیدیا۔
ملک میں انٹرنیٹ کی بندش کے خلاف درخواست پر سماعت لاہور ہائیکورٹ کے جسٹس شکیل احمد کر رہے ہیں۔
درخواست گزار وکیل ندیم سرور نے دوران سماعت مؤقف اختیار کیا کہ ملک میں بغیر کسی نوٹس اور وجہ بتائے انٹرنیٹ اور سوشل میڈیا ایپس بند کر دی گئی ہیں، انٹرنیٹ بند کرنا بنیادی حقوق کی بھی خلاف ورزی ہے۔
درخواست میں استدعا کی گئی ہے کہ ملک میں انٹرنیٹ مکمل اور فوری بحال کرنے کے احکامات جاری کیے جائیں۔
لاہور ہائیکورٹ نے وفاقی حکومت کے وکیل کو متعلقہ حکام سے ہدایات لے کر 12 بجے پیش ہونے کا حکم دیتے ہوئے سماعت میں وقفہ کر دیا۔
