ملک کے مختلف حصوں میں بارشوں نے تباہی مچادی ،8 افرادجاں بحق ، نشیبی علاقے زیر آب

ملک کے مختلف حصوں میں بارشوں نے تباہی مچا دی، کئی علاقوں میں  سیلابی صورتِ حال  ہے جبکہ پنجاب کے کئی اضلاع کے نشیبی علاقے زیر آب  آگئے ہیں۔ 

پنجاب کے شہر فیصل آباد، نارووال اور رحیم یار خان میں بارش کے باعث مختلف حادثات میں 8 افراد جان سے گئے۔

 راجن پور اور ڈیرا غازی خان کے کوہِ سلیمان کے پہاڑی علاقوں میں موسلا دھار بارش سے ندی نالے بپھر گئے ۔

بلوچستان کے علاقوں توبہ اچکزئی، توبہ کاکڑی، قلعہ عبداللہ، پشین اور زیارت میں سیلابی ریلوں سے فصلوں کو نقصان  پہنچا جبکہ دیواریں اور سولر پینلز گرنے سے 10 افراد زخمی ہوئے۔

چمن میں ریلوے ٹریک ریلے میں بہہ گیا جبکہ نوشکی میں ریلوے ٹریک میں شگاف  پڑگیا جس کی وجہ سے پاک ایران ریلوے رابطہ بھِی منقطع  ہوگیا۔

جیکب آباد کے علاقے گڑھی خیرو کے قریب نہر میں 70 فٹ چوڑا شگاف پڑگیا ، دھان کی فصل زیرِ آب  گئی۔

ملک کے مختلف علاقوں میں آندھی اور بارش کا امکان، اربن فلڈنگ کا خدشہ

دریائے چناب میں درمیانے سے اونچے درجے کا آبی ریلا متوقع ہے، جنوبی پنجاب اور بلوچستان کے ندی نالوں میں طغیانی کا خدشہ

 ادھر خیرپور ،سکھر اور مضافاتی علاقوں میں موسلادھار بارش ہوئی۔

رپورٹ کے مطابق سکھر میں 180ملی میٹربارش ریکارڈ  کی گئی، بارش کی وجہ سے کئی علاقوں میں بجلی معطل  ہوگئی۔

اس کے علاوہ جنوبی وزیرستان میں شدید بارش کے بعد سیلابی ریلوں نے تباہی مچا دی ، سیلابی ریلا جنڈولہ بازار میں داخل  ہوگیا جس کی وجہ سے  زرعی زمینوں کو بھی نقصان پہنچا۔

طوفانی بارشوں سے وانا گومل زام روڈ لینڈ سلائیڈنگ کے باعث کئی مقامات پر بند  ہوگئی اور  ٹریفک کی روانی متاثر  ہے۔

دوسری جانب خیبر میں بارش کے بعد برساتی نالوں میں طغیانی آگئی ، متاثرہ علاقوں میں لوگ اپنی مدد آپ کے تحت حفاظتی انتظامات میں مصروف  ہیں۔ 

محکمہ مو سمیات کا کہناہے کہ آج سندھ، پنجاب اور مشرقی بلوچستان کے بعض علا قوں میں موسلادھار بارش کا امکان ہے۔