22 اگست ، 2024 
پی ٹی آئی کی سیاسی اور کور کمیٹی جلسہ منسوخی کے فیصلے سے لاعلم، اپوزیشن اتحاد بھی ناراض
22 اگست ، 2024
اسلام آباد: پاکستان تحریک انصاف کی سیاسی کمیٹی اور کورکمیٹی جلسہ منسوخی کے فیصلے سے لاعلم نکلی۔
پارٹی ذرائع کے مطابق کورکمیٹی ممبران نے جلسہ منسوخی کے فیصلے پر تحفظات کا اظہار کیا ہے جب کہ سیاسی کمیٹی کے ارکان نے بھی جلسہ منسوخی کے اعلان اور فیصلے پر تشویش کا اظہار کیا۔
اپوزیشن ذرائع کا کہنا ہےکہ اپوزیشن اتحاد تحریک تحفظ آئین پاکستان کی جماعتوں سے بھی کوئی مشاورت نہ ہوئی، تحریک تحفظ آئین پاکستان کی قیادت اور جماعتیں جلسے میں شرکت کے لیے تیار تھیں جب کہ اپوزیشن الائنس کی جماعتوں کو آگاہ کیے گئے بغیر جلسہ منسوخی کا اعلان کیا گیا۔
اپوزیشن ذرائع کے مطابق اپوزیشن اتحاد کی جماعتوں اور قیادت کو میڈیا کے ذریعے جلسہ منسوخی کی اطلاع ملی، جلسےکی وجہ سے ایم ڈبلیو ایم سربراہ علامہ ناصر عباس ملک سے باہر نہ جا سکے۔
ذرائع نے بتایا کہ تحریک تحفظ آئین پاکستان کی جماعتوں نے جلسہ منسوخی پرپی ٹی آئی سے سخت مؤقف رکھنے کا فیصلہ کیا ہے۔
