ہاکی کے 3 قومی کھلاڑی بغیر اجازت بیرون ملک چلے گئے، سیاسی پناہ کی درخواست دینے کا انکشاف

پاکستان ہاکی فیڈریشن کے سیکرٹری رانا مجاہد نے انکشاف کیا ہے کہ ہاکی کے 3 قومی کھلاڑیوں اور فزیو نے بیرون ملک سیاسی پناہ کی درخواست دی ہے۔

لاہور میں پریس کانفرنس کرتے ہوئے رانا مجاہد کا کہنا تھاکہ تین کھلاڑیوں اور فزیو پر تاحیات پابندی لگائی گئی ہے، تینوں کھلاڑی اور ایک فزیو ملک سے باہر گئے ہیں لیکن انہوں نے اس حوالے سے بتایا نہیں۔

انہوں نے کہا کہ ہمیں اطلاع ملی ہے کہ انہوں نے بیرون ملک سیاسی پناہ کی درخواست دی ہوئی ہے،  تینوں کھلاڑیوں نے ٹیم کے ساتھ پولینڈ اور ہالینڈ کا دورہ کیا تھا اور وہ نیشنز کپ کیلئے ٹیم کے ساتھ گئے تھے اور واپس آئے تھے لیکن کیمپ میں نہیں آئے، پتہ چلا ہے وہ ملک سے باہر چلے گئے ہیں لہٰذا تینوں پر پابندی لگانے کا فیصلہ کیا ہے کیونکہ وہ این او سی کے بغیر باہر گئے ہیں۔

ہاکی ٹیم ادھار کی ٹکٹوں پر ایشین چیمپئن شپ کیلئے چین گئی ہے، صدر پی ایچ ایف

ہاکی پر توجہ کی ضرورت ہے، وزیراعظم شہباز شریف ہاکی کے لیے خصوصی گرانٹ دیں، صدر پی ایچ ایف طارق بگٹی

ان کا کہناتھاکہ کھلاڑیوں میں مرتضیٰ یعقوب، احتشام اسلم، عبد الرحمان اور فزیو وقاص شامل ہیں۔

سیکرٹری فیڈریشن کا کہنا تھاکہ چاروں افراد کے پاسپورٹ کینسل کرانے کیلئے وزارت داخلہ کو لکھیں گے، ڈپارٹمنٹس کو بھی اس حوالے سے لکھ دیا ہے۔

انہوں نے بتایاکہ کھلاڑی  کس ملک گئے ہیں اس کا علم نہیں  لیکن ان کے ساتھی کھلاڑیوں نے باہر جانے کی تصدیق کی ہے، انہوں نے ہم سے جھوٹ بولا کہ وہ فیملی مصروفیت کی وجہ سے کیمپ میں نہیں آ سکتے۔