بارشوں کے دوران جانی و مالی نقصانات سے بچانے میں مددگار آسان احتیاطی تدابیر

برسات کے موسم میں غفلت اور لاپرواہی کی وجہ سے حادثات کا پیش آنا ایک معمول بن گیا ہے لیکن اگر ہم ذرا سی احتیاط سے کام لیں تو اس موسم میں جانی نقصان سے بچا جاسکتا ہے۔

ملک کے مختلف حصوں میں بارشوں کا سلسلہ جاری ہے اور آئندہ چند روز تک یہ برقرار رہے گا۔

ایسے میں شہریوں کو چند احتیاطی تدابیر اپنانے اور بنیادی انتظامات کرنا ضروری ہیں جن سے حادثات سے بچا جاسکتا ہے۔

چھتری اور رین کوٹ استعمال کریں

بارشوں کے موسم میں چھتری اور رین کوٹ بنیادی ضروریات ہیں، اس لیے بارش میں باہر جانے سے پہلے چھتری یا رین کوٹ لازمی اپنے ساتھ رکھیں۔

اس سے نہ صرف آپ بارش سے محفوظ رہیں گے بلکہ آپ کا ذاتی سامان بھی بھیگنے سے بچ جائے گا جبکہ بارش میں پلاسٹک بیگ بھی ساتھ رکھنا آپ کے کام آسکتا ہے جس میں موبائل فون اور ایسا قیمتی سامان رکھا جاسکتا ہے جو بھیگ کر خراب ہوسکتا ہے۔

گھر کے دروازے اور کھڑکیاں بندرکھیں

اس موسم میں گھروں میں پانی بھر جانا ایک بڑا مسئلہ ہے جس سے لوگوں کا کافی نقصان بھی ہوجاتا ہے۔

اس لیے بہتر ہے آپ بارش برسنے کے دوران گھر کی کھڑکیاں اور دروازے اچھے طریقے سے بند رکھیں تاکہ پانی گھر میں داخل نہ ہوسکےاور گھر کا فرنیچر خراب نہ ہو۔

بجلی کے پول اورتاروں سے دور رہیں

ہر سال بارشوں کے دوران کرنٹ لگنے سے متعدد اموات ہوتی ہیں جن میں سے زیادہ تر ہماری غفلت کے باعث ہوتی ہیں۔

لہٰذا ایسے موسم میں بجلی کے پول اور خاص کر گری ہوئی تاروں سے فاصلہ رکھیں کیونکہ ان میں دوڑنے والی برقی رو آپ کے لیے جان لیوا ثابت ہوسکتی ہے۔

کھڑے پانی سے گزرنے سے گریز کریں

بارش کے موسم میں بلاضرورت باہر نہ نکلیں اور خاص کر جہاں پانی زیادہ کھڑا ہو وہاں سے گزرنے سے گریز کریں۔

اس کی وجہ یہ ہے کہ پانی کے نیچے کھلے گٹر چھپے ہوسکتے ہیں جس سے جانی نقصان ہوسکتاہے، اس لیے بہتر ہے کہ زیادہ ایمرجنسی کی صورت میں ہی باہر نکلا جائے۔

گاڑی کی رفتار کم رکھیں

مون سون سیزن میں تجربہ کار ڈرائیورز کے لیے بھی ڈرائیونگ کرنا آسان نہیں کیونکہ اس موسم میں سڑکیں گیلی ہونے کی وجہ سے گاڑیوں کے پھسلنے کا خطرہ زیادہ ہوتا ہے۔

اس موسم میں ڈرائیونگ کے دوران گاڑی کو اچانک موڑنے اور بریک لگانے سے گریز کریں جبکہ آگے والی گاڑی سے فاصلہ رکھیں، بڑی گاڑیوں سے دور رہیں اور ہیڈلائٹ آن کردیں تاکہ آپ کی گاڑی دوسروں کو بھی نظر آئے۔

اس کے علاوہ بارشوں کے موسم میں اپنی گاڑی میں تیل اور دیگر چیزوں کا معائنہ کرکے باہر نکلیں۔

برقی آلات کے پلگ کو ساکٹ سے نکال دیں

بارش کے موسم میں بجلی کے جان لیوا خطرے سے بچنے کی حفاظتی تدابیر میں سے ایک یہ بھی ہے۔

آپ اپنے گھر میں موجود تمام برقی آلات کو ان پلگ (unplug) کردیں کیونکہ اس موسم میں وولٹیج کبھی کم اور کبھی زیادہ ہوتا ہے جس سے شارٹ سرکٹ کا خدشہ ہوتا ہے۔