30 اگست ، 2024 
سکیورٹی فورسز کا وادی تیرہ میں آپریشن، فتنہ الخوارج کے 12 دہشتگرد ہلاک
30 اگست ، 2024
سکیورٹی فورسز کے خیبرکے علاقے وادی تیرہ میں خوارج کی موجودگی کی اطلاع پر انٹیلی جنس بیسڈ آپریشن میں فتنہ الخوارج کے 12 دہشت گردہلاک کر دیے گئے۔
پاک فوج کے شعبہ تعلقات عامہ (آئی ایس پی آر) کے مطابق 28 اور 29 اگست کو پاک فوج نے خوارج کے ٹھکانوں کو مؤثر طریقے سے نشانہ بنایا۔
آئی ایس پی آر نے بتایا کہ آپریشن کے دوران شدید فائرنگ کے تبادلے کے بعد فتنہ الخوارج کے 12 خوارج کو جہنم واصل کردیا گیا۔
آئی ایس پی آر کا کہنا ہے کہ سکیورٹی فورسز کی ان کارروائیوں سے فتنہ الخوارج اور ان کے حمایتیوں کو بڑا دھچکا لگا ہے اور اب تک 37 دہشتگردوں کو جہنم واصل کیا جاچکا ہے جبکہ 14 دہشت گرد شدید زخمی ہوچکے ہیں۔
آئی ایس پی آر نے بتایا کہ علاقے میں امن کی بحالی اور فتنہ الخوارج کے خاتمے تک انٹیلی جنس بیسڈ آپریشن جاری رہیں گے، سکیورٹی فورسز ملک سے دہشتگردی کی لعنت کو ختم کرنے کے لیے پرعزم ہیں۔
