06 ستمبر ، 2024 
امیر ترین بالی وڈ کنگ شاہ رخ کتنے اثاثوں کے مالک ہیں؟
06 ستمبر ، 2024
بالی وڈ کنگ شاہ رخ خان 2024 میں تمام بالی وڈ اداکاروں کو پیچھے چھوڑتے ہوئے امیر ترین اداکاروں کی دوڑ میں سرفہرست ہیں۔
حال میں ہورون انڈیا رچ لسٹ کی جانب سے کیے گئے انکشاف کے مطابق رواں سال کنگ خان کی کل دولت 7300 کروڑ رہی۔
شاہ رخ کے اثاثوں پر ایک نظر
3 دہائیوں پر محیط بالی وڈ کیرئیر کے دوران شاہ رخ نے درجنوں بھارتی فلموں میں اداکاری کے جوہر دکھائے۔
بالی وڈ کے ایک کامیاب اداکار ہونے کے ساتھ شاہ رخ خان اس وقت ایک کامیاب پروڈیوسر اور کاروباری شخصیت بھی ہیں ۔
شاہ رخ خان نے ہزاروں کروڑ کی دولت کیسے جمع کی؟
سپر اسٹار کی آمدنی کے ایک نہیں کئی ذرائع ہیں، بنیادی ذریعہ بالی وڈ فلموں سے حاصل ہونے والا معاوضہ ہے، اس کے علاوہ بڑے برانڈز کے ساتھ معاہدہ اور ان کی پروڈکشن کمپنی ریڈ چلیز انٹرٹینمنٹ بھی آمدنی کے ذرائع میں شامل ہیں۔
اس کے ساتھ ساتھ شاہ رخ نے ممبئی، لندن اور دبئی میں جائیدادوں میں سرمایہ کاری کی ہوئی ہے ، سب سے آخر میں اداکار کی آئی پی ایل کرکٹ ٹیم کولکتہ نائٹ رائیڈرز میں شریک ملکیت بھی انہیں آمدنی کا ایک خاص حصہ فراہم کرتی ہے۔
فلموں کا معاوضہ
بھارتی میڈیا کے مطابق شاہ رخ ایک فلم کا معاوضہ تقریباً 18 ملین سے 30 ملین ڈالر وصول کرتے ہیں، انہوں نے 2023 میں بالی وڈ فلم جوان کے لیے تقریباً 12 ملین ڈالر (بھارتی 100 کروڑ ) وصول کیے۔
شاہ رخ خان کی جائیدادیں
شاہ رخ خان نے بھارت کے علاوہ مختلف ملکوں میں بھی جائیدادوں کے ذریعے سرمایہ کاری بھی کی ہے۔
ممبئی میں ان کی رہائش گاہ منت کی قیمت تقریباً 28 ملین ڈالر (200 کروڑ بھارتی روپے) ہے جب کہ وہ لندن اور دبئی میں پرتعیش جائیدادوں کے مالک ہیں۔
اداکار کے پراپرٹی پورٹ فولیو میں دبئی کے پام جمیرہ پر ایک وسیع و عریض ولا اور لندن کے پارک لائن پر ایک خوبصورت اپارٹمنٹ بھی شامل ہے۔
آئی پی ایل ٹیم کی ملکیت
شاہ رخ خان انڈین پریمیئر لیگ ( آئی پی ایل ) کی ٹیم کولکتہ نائٹ رائیڈرز کے شریک مالک بھی ہیں، کے کے آر برانڈ ویلیو کا تخمینہ 100 ملین ڈالر سے زیادہ ہے۔
شاہ رخ کے پاس موجود قیمتی گاڑیاں
2023کی ایک رپورٹ کے مطابق شاہ رخ خان کے پاس بی ایم ڈبلیو 18، آڈی اے6، رولز رائس فینٹم، بینٹلے کانٹینینٹل جی ٹی، مرسڈیز ایس کلاس، رینج روور ووگ، ہندائی کریٹا سمیت کئی بیش قیمت گاڑیاں موجود ہیں۔
