سونم کے سسر نے بیٹے اور بہو کیلئے لندن میں 231 کروڑ کا عالیشان گھر خرید لیا

بالی وڈ اداکارہ سونم کپور کے سسر  اور معروف بزنس مین ہریش آہوجا نے لندن میں 21 ملین پاؤنڈز میں ایک عالیشان پراپرٹی خریدی ہے جو اس سال برطانیہ میں سب سے بڑے رہائشی سودوں میں سے ایک ہے۔

بھارتی میڈیا نے بلومبرگ کی ایک رپورٹ کا حوالہ دیتے ہوئے بتایا ہے کہ سونم کپور کے سسر اور معروف بزنس مین ہریش آہوجا نے لندن کے ناٹنگ ہل ڈسٹرکٹ میں تقریباً 231.47 کروڑ بھارتی روپے میں عالیشان گھر خریدا ہے جس میں بالی وڈ اداکارہ اپنے شوہر کے ساتھ جلد منتقل ہوں گی۔

بلومبرگ کی رپورٹ میں بتایا گیا کہ ہریش نے رواں سال جولائی میں 8  منزلہ عالیشان رہائشی عمارت خریدی۔ یہ پراپرٹی تقریباً 20 ہزار مربع فٹ جگہ پر بنی ہے۔ 

رپورٹ میں کہا گیا ہے کہ یہ عمارت پہلے برطانیہ کی ایک معروف چیریٹی آرگنائزیشن کی ملکیت تھی۔ اب اس عالیشان پراپرٹی کا ایک حصہ سونم کپور اور ان کے شوہر آنند آہوجا اپنی رہائش کے لیے استعمال کریں گے جبکہ  عمارت کے باقی حصے کو فلیٹس میں تبدیل کیے جانے کا امکان ہے۔

بالی وڈ اسٹارز کے ’عالیشان گھروں‘ کی قیمتیں

بالی وڈ اسٹارز کی ایک ایک فلم کا معاوضہ کروڑوں میں ہوتا ہے اور یہی معاوضہ اسٹارز کے عالیشان طرز رہائش کی وجہ بن جاتا ہے۔

یاد رہے کہ سونم کپور اور آنند آہوجا نے 2018 میں شادی کی جبکہ جوڑے کے ہاں اگست 2022 میں بیٹے کی پیدائش ہوئی۔

سونم کپور شادی کے بعد زیادہ تر قیام لندن میں ہی کرتی ہیں لیکن وہ اکثر بھارت بھی آتی رہتی ہیں۔