واٹس ایپ کا نیا فیچر جو آپ کو بڑے خطرے سے تحفظ فراہم کرے گا

موجودہ عہد میں سوشل میڈیا اور میسجنگ ایپس کا استعمال بہت زیادہ بڑھ چکا ہے جیسے واٹس ایپ کو ہی دنیا بھر میں 2 ارب سے زائد افراد استعمال کرتے ہیں۔

میٹا کی زیر ملکیت میسجنگ ایپ کو دوستوں اور گھر والوں سے رابطے کے لیے استعمال کیا جاتا ہے۔

یہی وجہ ہے کہ سائبر کرمنلز اور فراڈ کرنے والے افراد واٹس ایپ کے ذریعے لوگوں کو ہدف بنانے کی کوشش کرتے ہیں۔

واٹس ایپ میں ٹھوس پرائیویسی اور سکیورٹی فیچرز کی موجودگی کے باوجود جرائم پیشہ عناصر اسے لوگوں کو دھوکا دینے کے لیے استعمال کرلیتے ہیں۔

ان کی جانب سے ایسے فرضی میسجز بھیجے جاتے ہیں جو نقصان دہ لنکس پر مشتمل ہوتے ہیں اور ان پر کلک کرنے سے آپ کے اکاؤنٹس ہیک ہوسکتے ہیں، میل وئیر ڈیوائس میں انسٹال جبکہ ذاتی ڈیٹا چوری ہوسکتا ہے۔

یہی وجہ ہے کہ واٹس ایپ کی جانب سے ایک ایسا سکیورٹی فیچر متعارف کرایا جا رہا ہے جو اس خطرے سے صارفین کو تحفظ فراہم کرے گا۔

لنک ویریفکیشن فیچر کے ذریعے صارفین چیک کرسکیں گے کہ ایپ میں موصول ہونے والا لنک محفوظ ہے یا نہیں۔

یہ فیچر ابھی واٹس ایپ کے اینڈرائیڈ بیٹا (beta) ورژن میں متعارف کرایا گیا ہے۔

ایک رپورٹ کے مطابق اس فیچر کے ذریعے صارفین لنکس کو گوگل سرچ کے ذریعے جانچ سکیں گے۔

اس سے صارفین کو یہ جاننے کا موقع ملے گا کہ جس لنک پر وہ کلک کرنے والے ہیں وہ کس حد تک مستند ہے۔

یہ فیچر ایسے افراد کے لیے بہت زیادہ کارآمد ہوگا جن کو ایسے لنکس زیادہ موصول ہوتے ہیں جن کو متعدد بار فارورڈ کیا جاچکا ہوتا ہے۔

ایسے لنکس کے نقصان دہ ہونے کا امکان زیادہ ہوتا ہے۔

جیسا اوپر درج کیا جاچکا ہے کہ یہ فیچر ابھی بیٹا ورژن میں متعارف کرایا گیا ہے تو تمام صارفین کو یہ کب تک دستیاب ہوگا، اس بارے میں ابھی کہنا مشکل ہے۔