30 ستمبر ، 2024 
63 اے کی نظرثانی: آج کی سماعت قانون اور رولز کے مطابق نہیں، جسٹس منیب نے ایک اور خط لکھ دیا
30 ستمبر ، 2024
سپریم کورٹ کے جسٹس منیب اختر نے رجسٹرار سپریم کورٹ کو ایک اور خط لکھ دیا۔
سپریم کورٹ میں آرٹیکل 63 اے کی تشریح سے متعلق نظرثانی کیس کی آج سماعت ہوئی۔
خط میں جسٹس منیب اختر نے آج کی سماعت کے حکم نامے کوغیرقانونی قرار دے دیا۔ جسٹس منیب نے خط میں کہا کہ پانچ رکنی لارجربینچ نے کیس کی سماعت کرنی تھی، چار رکنی بینچ عدالت میں بیٹھ کرآرٹیکل63 اے سے متعلق نظرثانی کیس نہیں سن سکتا۔
انہوں نے کہا کہ آج کی سماعت کا حکم نامہ مجھے بھیجا گیا، حکم نامے میں میرا نام لکھا ہوا ہے مگر آگے دستخط نہیں، بینچ میں بیٹھنے والے4 ججز قابل احترام ہیں مگر آج کی سماعت قانون اور رولز کے مطابق نہیں۔
جسٹس منیب کے خط کے متن کے مطابق اپنا مؤقف پہلےخط میں تفصیل سے بیان کرچکا ہوں اور آج کی سماعت کے حکم نامےپراحتجاج ریکارڈ کرانا چاہتا ہوں۔
ان کا کہنا تھاکہ آج کی سماعت کا حکم نامہ جوڈیشل آرڈرنہیں، آرٹیکل63 اے کی تشریح سے متعلق نظرثانی کیس کے حکم نامے کی کوئی حیثیت نہیں۔
خیال رہے کہ سپریم کورٹ میں آج آرٹیکل 63 اے کے فیصلے پرنظرثانی کیس کی سماعت ہوئی، پانچ رکنی بینچ میں شامل جسٹس منیب اختر سماعت کےلیے نہیں آئے، چیف جسٹس آف پاکستان نے جسٹس منیب کا رجسٹرار سپریم کورٹ کو لکھا گیا خط پڑھ کرسنایا تھا۔
