پنجاب میں دفعہ 144 کا نفاذ، میانوالی میں موبائل اور انٹرنیٹ سروس بند

پنجاب حکومت نے فیصل آباد، بہاولپور ، ٹوبہ ٹیک سنگھ، میانوالی، چنیوٹ اورجھنگ میں دفعہ 144 نافذ کردی۔

جن اضلاع میں دفعہ 144نافذ کی گئی وہاں ہر قسم کے سیاسی اجتماعات، دھرنوں، جلسوں اور مظاہروں سمیت احتجاجی سرگرمیوں پر پابندی عائد کی گئی ہے   جب کہ مختلف شہروں میں کنٹینرز کھڑےکردیے گئےہیں۔

ادھر میانوالی میں موبائل فون اور انٹر نیٹ سروس بند ہے جب کہ رینجرز کی 2 کمپنیاں بھی تعینات  کردی گئی ہیں۔

پنجاب حکومت نے دفعہ 144 کے نفاذ میں 90 دن کی توسیع کی تجویز دے دی

یہ نوٹ کرنا بھی ضروری ہے کہ دفعہ 144 کی خلاف ورزی کرنے والے افراد کو قانونی چارہ جوئی کا سامنا کرنا پڑے گا جس کی سزا 1 سے 6 ماہ تک قید ہے۔

دوسری جانب بہاولپور میں دفعہ 144 کی خلاف ورزی پر پی ٹی آئی کے 100 سے زائدکارکنوں پرمقدمہ درج کرلیا گیا اور 5 کارکنوں کو  گرفتار کیا جاچکا ہے۔

یاد رہے  کہ  پاکستان تحریک انصاف( پی ٹی آئی)  نے آج احتجاج کا اعلان کیا ہے۔

 پنجاب حکومت نے صوبائی اسمبلی میں ایک ترمیمی بل پیش کیا ہے جس کے تحت دفعہ 144 کو کم از کم 3 ماہ کے لیے نافذ کرنے کی اجازت دی گئی ہے، یہ نوآبادیاتی دور کا قانون ہے اور عوامی اجتماعات پر پابندی کے لیے استعمال کیا جاتا ہے۔