07 اکتوبر ، 2024 
اونٹوں کے جسم میں کوہان کس کام آتے ہیں؟
07 اکتوبر ، 2024
اونٹوں کو صحرا کا جہاز کہا جاتا ہے جو کئی دنوں تک پانی کے بغیر بھی زندہ رہ سکتے ہیں۔
مگر کیا اونٹ اپنے کوہان میں پانی کا ذخیرہ کرتے ہیں جیسا بیشتر افراد سوچتے ہیں؟ اس کا جواب نہیں ہے۔
اگرچہ اونٹوں کے پاس پانی کو ذخیرہ کرنے کے متعدد طریقے موجود ہیں مگر ان کے کوہان اس مقصد کے لیے نہیں ہوتے۔
تو پھر اونٹوں کی پشت پر کوہان کیوں موجود ہوتے ہیں؟ اس کا جواب ہے کہ وہاں چربی کا ذخیرہ ہوتا ہے۔
ماہرین کے مطابق صحرا کے خشک موسم میں اکثر پانی اور خوراک کی کمی ہوتی ہے تو جب کھانا دستیاب ہوتا ہے تو اونٹ اتنا کھا لیتے ہیں کہ اس کی کیلیوریز سے چربی کوہان کی شکل میں جمع ہو جاتی ہے تاکہ وہ غذا کے بغیر بھی طویل عرصے تک زندہ رہ سکیں۔
ایک کوہان کی بدولت اونٹ خوراک کے بغیر 4 یا 5 ماہ تک زندہ رہ سکتے ہیں۔
جب خوراک نہ ملنے پر اونٹوں کا جسم یہ چربی استعمال کرتا ہے تو کوہان کسی غبارے کی طرح پچک جاتے ہیں، مگر دوبارہ مناسب مقدار میں کھانے سے وہ پھر پھول جاتے ہیں۔
اونٹوں کے بچے کوہان کے ساتھ پیدا نہیں ہوتے۔
پیدائش کے 10 ماہ سے ایک سال بعد کوہان بننا شروع ہوتے ہیں مگر ایسا جنگلی اونٹوں میں زیادہ عام ہوتا ہے کیونکہ خشک سالی کے باعث صحرا میں خوراک کی کمی ہوتی ہے۔
اونٹوں کی 2 اقسام ہیں، ایک Bactrian camels جو مغربی چین اور وسطی ایشیا میں پائی جاتی ہے جن کے جسموں میں 2 کوہان ہوتے ہیں جبکہ دوسری قسم عربی اونٹوں کی ہے جن کے جسم میں ایک کوہان ہوتا ہے۔
مگر ماہرین کے مطابق 2 کوہانوں سے بغیر خوراک کے زندہ رہنے کی مدت میں اضافہ نہیں ہوتا۔
مزید خبریں :
ایشیا اور یورپ کو آپس میں جوڑنے والا منفرد جزیرہ
20 دسمبر ، 2024
وہ خاندان جس کے ہاں 65 سال بعد پہلے لڑکے کی پیدائش
18 دسمبر ، 2024
آخر اس ٹیپ میں یہ دھاتی ٹکڑا کیوں ہوتا ہے؟
18 دسمبر ، 2024
