11 اکتوبر ، 2024 
ملک کو یرغمال نہیں بننے دیں گے، وزیر دفاع کا پی ٹی آئی کے 15 اکتوبر کے احتجاج کے اعلان پر ردعمل
11 اکتوبر ، 2024
وزیر دفاع خواجہ آصف نے پی ٹی آئی کی جانب سے 15 اکتوبر کو ڈی چوک پر احتجاج کے اعلان پر ردعمل دیتے ہوئے کہا ہے کہ یہ پاکستان میں عدم استحکام پیداکرنے کی کڑی ہے۔
خواجہ آصف نے کہا کہ شنگھائی تعاون تنظیم (ایس سی او) کے سربراہان اکٹھے ہورہے ہیں، ملک کو یرغمال بننے نہیں دیں گے۔
وزیر دفاع نے تنقید کرتے ہوئے کہا کہ یہ بین الاقوامی سازشوں کے مہرے ہیں،اقتدار آنے جانے والی چیز ہے، کسی کی میراث نہیں، بانی پی ٹی آئی اقتدار سے محروم ہوئے تو 9 مئی برپا کردیا۔
دوسری جانب وزیر اطلاعات عطا اللہ تارڑ نے ایس سی او اجلاس سے متعلق گفتگو کرتے ہوئے کہا ہے کہ ایس سی او اجلاس خوش اسلوبی سے آگے چلے گا، شرپسند عناصر کو رخنہ ڈالنے کا موقع نہیں ملے گا، سازشی ذہنیت والوں کو گھربیٹھنا چاہیے۔
وزیر اطلاعات نے کہا ہے کہ شنگھائی تعاون تنظیم میں سربراہان مملکت آئیں گے، ہم مہمانوں کا استقبال کرنے کے لیے تیار ہیں، وزیراعظم نے دورہ کیا اور استقبال کے انتظامات دیکھے۔
عطااللہ تارڑ نے کہا کہ شنگھائی تعاون تنظیم کے تحت 12 ملکوں کے سربراہان آرہے ہیں، پاکستان کی عزت و تکریم میں بین الاقوامی سطح پر اضافہ ہوگا، ایس سی او سربراہی اجلاس کی میزبانی پاکستان کے لیے اعزاز ہے۔
وزیر اطلاعات نے کہا کہ سکیورٹی انتظامات مکمل ہیں، فوج، رینجرز اور پولیس تعینات ہے۔
