کالے ہرن کے شکار کے بعد سلمان خان نے ہمیں بلینک چیک دیا: بشنوئی کے قریبی ساتھی کا انکشاف

بھارتی گجرات کی جیل میں قید بدنام زمانہ گینگسٹر لارنس بشنوئی کے کزن رمیش بشنوئی نے انکشاف کیا ہے کہ سلمان خان نے شکار سے متعلق خود پر لگنے والے الزامات کے بعد لارنس بشنوئی کمیونٹی کو مالی طور پر مطمئن کرنے کی کوشش کی تھی۔

احمد آباد کی سینٹرل جیل میں قید لارنس بشنوئی اور  اس کے گینگ کی جانب سے کالے ہرن کے شکار کے واقعے کے بعد سلمان خان کو کئی دھمکیاں دی جاچکی ہیں۔

بھارتی میڈیا کو دیے گئے ایک انٹرویو میں رمیش بشنوئی نے بتایا کہ کالے ہرن کے شکار سے متعلق الزامات کے بعد سلمان خان ہمارے پاس  ایک خالی  چیک بک لے کرآئے  تھے اور ہم  سے کہا تھا کہ  ہم  اپنی مرضی کی رقم اس چیک میں درج کرسکتے ہیں لیکن کمیونٹی نے اس پیشکش کو سختی سے مسترد کردیا۔

رمیش بشنوئی کا کہنا تھا کہ اگر ہمیں واقعی پیسے کی ضرورت ہوتی تو ہم سلمان خان کی پیشکش کو قبول کر لیتے۔

رمیش نے لارنس بشنوئی کمیونٹی کے اندر جذباتی انتشار کی مزید وضاحت کرتے ہوئے کہا کہ جب کالے ہرن کا واقعہ پیش آیا تو  کمیونٹی کا خون کھول رہا تھا ۔

کالے ہرن کا شکار اور سلمان خان کی لارنس بشنوئی گینگ سے دشمنیاں

واضح رہے کہ سلمان خان پر 1998 میں بالی وڈ کی کامیاب ترین فلم ’ہم ساتھ ساتھ ہیں‘ کی شوٹنگ کے دوران راجستھان کے ایک گاؤں میں 2 نایاب کالے ہرنوں کے شکار کا الزام ہے۔

سلمان خان سمیت سیف علی خان اور تبو پر بھی شوٹنگ کے دوران کالے ہرن کا شکار کرنے کا الزام لگایا گیا تھا جس کے بعد سے سلمان خان کو بشنوئی گینگ اور ان کے افراد کی جانب سے مسلسل دھمکیوں کا سامنا ہے۔

لارنس بشنوئی کمیونٹی کالے ہرن کو مقدس مانتی ہے بنیادی طور پر یہ لوگ سبزی خور ہوتے ہیں اور جانوروں کی حفاظت کے لیے اپنی جان بھی دے سکتے ہیں لہٰذا اس واقعے نے گہری دشمنی کو جنم دیا ہے۔

بعد ازاں   2008میں دیے گئے ایک انٹرویو میں  سلمان خان  کالے ہرن کے شکار کے الزام کی تردید کرچکے ہیں لیکن اس کے باوجود  سلمان خان کو کالے ہرن کے غیر قانونی شکار کے مبینہ کیس میں گرفتار بھی کیا جاچکا ہے۔

 گزشتہ 26 سالوں کے دوران سلمان کے خلاف یہ کیس کئی بار بند اور متعدد بار کھولا جاچکا ہے تاہم 2016 میں انہیں اس کیس سے بری کر دیا گیا تھا۔

مزید برآں  2018 میں جودھ پور کی عدالت نے کالے ہرن کے کیس میں سلمان خان کو 5 سال قید کی سزا سنائی تھی تاہم بعد میں انہیں ضمانت دے دی گئی لیکن اس کے بعد سے بشنوئی برادری دبنگ اسٹار کی دشمن بنی ہوئی ہے اور یہ گینگ انہیں مختلف مواقع پر کئی خطرناک دھمکیاں دے چکا ہے۔