انٹرٹینمنٹ

کراچی میں مرد حضرات ایک بار تو دیکھیں گے لیکن یہاں خواتین کو زیادہ تنگ نہیں کیا جاتا: عائشہ طور

30 اکتوبر ، 2024

کراچی میں مرد حضرات ایک بار تو دیکھیں گے لیکن یہاں خواتین کو زیادہ تنگ نہیں کیا جاتا: عائشہ طور — مجھے کراچی میں مردوں کا اتنا غلبہ بھی نظر نہیں آتا جتنا لاہور یا اسلام آباد میں نظر آتا ہے: پوڈ کاسٹ میں گفتگو/ فائل فوٹو

پاکستانی اداکارہ و ماڈل عائشہ طور نے کہا ہےکہ کراچی میں مرد حضرات ایک بار تو دیکھیں گے لیکن یہاں خواتین کو زیادہ تنگ نہیں کیا جاتا۔

اداکارہ عائشہ طور حال ہی میں ایک پوڈ کاسٹ میں شریک ہوئیں جس دوران اداکارہ نے اپنے کیرئیر سمیت مختلف اور دلچسپ موضوعات پر بات کی۔

عائشہ طور کا کہنا تھا کہ کراچی مسائل سے بھرا ہوا شہر ہے ، یہاں سڑکیں نہیں ہیں، چوری ڈکیتی کی وارداتیں ہوتی ہیں،پانی اور بجلی سمیت بہت سے مسائل ہیں لیکن اس سب کے باوجود مجھے کراچی کے لوگ پسند ہیں۔

عائشہ طور نے کہا کہ’ کراچی میں جب آپ گھر سے نکلو تو کراچی کے لوگ( مرد حضرات ) ایک بار تو آپ کو دیکھیں گے لیکن اس کے بعد منہ موڑ کر اپنا کام کرنا شروع کردیں گے، مقصد یہ کہ یہاں لوگ خواتین کو زیادہ تنگ نہیں کرتے، اس کے علاوہ اگر کبھی سڑک پر کوئی مسئلہ ہوجائے تو لوگ آپ کی مدد کو آجاتے ہیں یہ تجربہ میں کئی بار خود کرچکی ہوں‘۔

یہ بھی پڑھیں

اداکارہ کا کہنا تھا کہ ’کراچی کے لوگوں کے پاس اتنا وقت نہیں کہ وہ خواتین کیلئے مسائل پیدا کریں، اپنی بات کروں تو مجھے کراچی میں کبھی اتنے مسائل کا سامنا نہیں کرنا پڑا جتنا مجھے پنجاب میں رہا، پنجاب میں لینڈ کرنے کے بعد سے ہی دونوں جگہوں پر موجود culture difference محسوس ہونے لگتا ہے لہٰذا مجھے کراچی پنجاب کے مقابلے بہتر لگتاہے‘۔

عائشہ طور نے مزید کہا کہ ’مجھے کراچی میں مردوں کا اتنا غلبہ بھی نظر نہیں آتا جتنا لاہور یا اسلام آباد میں نظر آتا ہے، لاہور میں اگرچہ مہمان نوازی اور محبت بہت ہے لیکن وہاں مردانہ مزاج کا غلبہ نظر آتا ہے جب کہ کراچی میں ایسا نہیں ہے‘۔