04 نومبر ، 2024 
وزیر کو سرکاری گھر کے بجائے اپنے گھر رہائش پرماہانہ 2 لاکھ کرایہ ملے گا، پختونخوا اسمبلی سے بل منظور
04 نومبر ، 2024
خیبر پختونخوا اسمبلی نے وزرا کی تنخواہوں اور مراعات کا ترمیمی بل 2024 منظور کرلیا۔
اسمبلی سے منظور شدہ نئی ترامیم کے تحت وزرا کو سرکاری گھر میں تزئین و آرائش کیلئے ایک دفعہ 10 لاکھ دیے جائیں گے، 10لاکھ روپے میں تزئین و آرائش میں قالین، پردے، ائیر کنڈیشنڈ اور ایک ریفریجریٹر شامل ہوگا۔
اس کے علاوہ سرکار ی گھر نہ ہونے کی صورت میں وزیر کو کرائے پر گھر لینے کیلئے ماہانہ 2 لاکھ روپے دیا جائے گا جبکہ کرائے کے گھر میں بھی وزرا تزئین و آرائش کیلئے ایک دفعہ 10لاکھ روپے خرچ کرسکیں گے، اسی طرح کوئی وزیر رہائش کیلئے اپنا ذاتی گھر استعمال میں لانے پر 2 لاکھ روپے کرایہ وصول کرسکے گا۔
اس کے علاوہ سرکاری یا کرائے کی رہائشگاہ خالی کرنے پر ترئین و آرائش کی اشیا واپس کریگا۔ اسمبلی نے شادی ہالز رات 10 بجے بند کرنے کی قرارداد بھی منظور کرلی۔
