کاروبار

سعودیہ سے 3 کھرب 33 ارب کی تیل سہولت پر آئی ایم ایف کے خدشات

14 نومبر ، 2024

اسلام آباد: سعودی عرب سے 3 کھرب 33 ارب روپے کی تیل سہولت پر عالمی مالیاتی ادارے (آئی ایم ایف) نے خدشات ظاہر کرتے ہوئے کہا کہ سعودی عرب تیل سہولت پر عملدرآمد کو ریکوڈک سے جوڑ سکتا ہے۔

ادھر ذرائع کا کہنا ہے کہ پاکستان کے پاس سعودی تیل سہولت کے علاوہ پلان بھی بھی موجود ہے تاہم ذرائع نے تفصیلات دینے سے انکار کردیا۔ تفصیلات کے مطابق دورہ کرنے والے آئی ایم ایف مشن نے 1.2 ارب ڈالر کے سعودی آئل سہولت (SOF) کے عملدرآمد پر خطرے کا نشان لگا دیا ہے کیونکہ خدشہ ہے کہ جدہ اسے ریکوڈک کے اربوں ڈالر کے معاہدے کے ساتھ جوڑ سکتا ہے، جس سے غیر ضروری تاخیر پیدا ہو سکتی ہے۔

مملکت سعودی عرب نے چند ماہ قبل آئی ایم ایف کے ایگزیکٹو بورڈ کی جانب سے 7 ارب ڈالر کے بیل آؤٹ پیکج کی منظوری کے وقت پاکستان کے لیے 1.2 ارب ڈالر SOF کی فراہمی کی یقین دہانی کرائی تھی۔

اب آئی ایم ایف کو خدشہ ہے کہ یہ مکمل نہیں ہو پائے گا حالانکہ سعودی فنڈ برائے ترقی (SFD) کا وفد آئندہ ماہ اسلام آباد کا دورہ کر سکتا ہے تاہم، وزیراعظم (پی ایم) آفس کے قریبی ذرائع نے بتایا ہے کہ پاکستان کے پاس سعودی آئل سہولت (SOF) کے بغیر بھی ایک پلان بی موجود ہے لیکن اس کی مزید تفصیلات نہیں بتائیں۔

ایک اور دھچکے میں، پاکستان اکتوبر 2024 کے آخر تک چاروں صوبائی اسمبلیوں کے ذریعے زرعی انکم ٹیکس (AIT) میں ترمیم کے آئی ایم ایف کے شرطیاتی (شرط کے مطابق) بینچ مارک (معیاری حد) کو پورا کرنے میں ناکام رہا۔