سیالکوٹ: سسرالیوں کے ہاتھوں بہو کے قتل کیس میں پیشرفت، ایک اور ملزم گرفتار

سیالکوٹ کی تحصیل ڈسکہ میں سسرالیوں کے ہاتھوں بہو کو قتل کرنےکے واقعے میں ملزمہ ساس کے چچازاد بھائی نوید کو بھی گرفتار کرلیا گیا۔

پولیس کے مطابق مقتولہ زارہ کی ساس صغراں نے دوران تفتیش بتایا کہ نوید نےلاش کے ٹکڑے کیے۔ ملزم نوید کو ملزمہ  نے قتل  سے پہلے آن لائن 10 ہزار  روپے منتقل کیے تھے۔

ابتدائی تحقیقات کے مطابق گوجرانوالا کے رہائشی پولیس اے ایس آئی شبیر احمد کی بیٹی زاراہ کی شادی 4 سال قبل خالہ زاد قدیر سے ہوئی تھی۔ سعودی عرب میں مقیم قدیر زارہ کو بھی ساتھ لے گیا تھا تاہم زارہ پاکستان آتی جاتی رہتی تھی اور اڑھائی سال قبل زارہ کے بیٹے شافع کی پیدائش ہوئی۔

سیالکوٹ: ساس نے بہو کا قتل کرکے ٹکڑے نالے میں کیوں بہائے؟ سنسنی خیز واردات کی کہانی سامنے آگئی

شادی کے بعد قدیر سارے پیسے بیوی کے اکاؤنٹ میں بھجوانے لگا تو ساس اور بہو میں جھگڑے شروع ہوگئے

 شادی کے بعد قدیر سارے پیسے بیوی کے اکاؤنٹ میں بھجوانے لگا تو ساس اور بہو میں جھگڑے شروع ہوگئے۔

صغراں نے پہلے بہو کے کردار پر الزامات لگا کر طلاق دلوانے کی کوشش کی اور ناکامی پر بیٹی یاسمین کےساتھ مل کر قتل کا منصوبہ بنالیا۔

ڈیڑھ ماہ پہلے زارہ  پاکستان آئی تو ماں بیٹی نے لاہور کے رشتے دار نوجوان نوید کو اٹلی بھجوانے کا کہہ کر ساتھ ملا لیا۔ ملزمان نے زارہ کو پہلے چہرے پر تکیہ رکھ کر قتل کیا اور پھر لاش کے ٹکڑےکیے، ملزمان نے شناخت چھپانے کے لیے چہرے کو آگ سے بھی جلا دیا۔

لاش 5 بوریوں میں ڈال کرملزم نوید واپس لاہور چلا گیا جب کہ ملزمہ صغراں نے بیٹی اور نواسے کی مدد سے بوریاں نالے میں پھینکیں۔

سیالکوٹ: سسرالیوں نے بہو کا قتل کرکے لاش کے ٹکڑے نالے میں پھینک دیے

دوران تفتیش ملزمان نے قتل کا اعتراف کیا جس کے بعد پولیس نے بوری بند ٹکڑوں والی لاش ایک نالے سے برآمدکر والی

زارہ کے والد نے پولیس کو بیٹی کے لاپتا ہونے کی اطلاع دی جس پر پولیس نے ملزمہ کے نواسے کو  حراست میں لے کر پوچھ گچھ کی تو اس نے سارا سچ اگل دیا۔

پولیس نےافسوسناک واقعے کی ابتدائی تحقیقات مکمل کرلیں اور مقتولہ کی ساس، نند یاسمین، نند کا بیٹا اور نوید نامی شخص کو گرفتار کرلیا۔