18 نومبر ، 2024 
سدھو نے کپل کے پروگرام میں واپس آنے کیلئے دلچسپ شرط رکھ دی
18 نومبر ، 2024
بھارتی ریاست پنجاب کے سابق وزیر و سابق کرکٹر نووجوت سنگھ سدھو نے کپل شرما شو میں واپسی کے لیے انوکھی شرط رکھ دی۔
حال ہی میں ڈیجیٹل اسٹریمنگ پلیٹ فارم نیٹ فلکس پر 'دی گریٹ انڈین کپل شو' کی نئی قسط نشر ہوئی جس میں سدھو اور ان کی اہلیہ سمیت بھارتی کرکٹر ہربھجن سنگھ اپنی اہلیہ کے ساتھ بطور مہمان شریک ہوئے۔
سدھو تقریباً 5 سال بعد کپل کے پروگرام میں دکھائی دیے، پروگرام کے اختتام پر سدھو نے کہا کہ یہ دن میری زندگی کا سب سے شاندار اور یادگار دن رہے گا، ساتھ ہی انہوں نے شو میں واپسی کی خواہش کا اظہار کیا۔
نووجوت سنگھ سدھو نے کہا کہ میں چاہتا ہوں جیسے یہ سب گلدستہ پہلے ہوتا تھا، ہم سب ساتھ ہوا کرتے تھے ویسے ہی اب دوبارہ ہم ساتھ ہوں لیکن اس میں ارچنا سنگھ بھی ساتھ ہوں۔
سدھو نے شرط رکھی کہ میں صرف ایک شرط پر واپس آؤں گا جب ارچنا بھی شو کا حصہ رہیں گی اور ہم دونوں اس شو میں موجود ہوں گے۔
واضح رہے کہ سدھو 2019 تک اس شو کا اہم حصہ رہے تاہم پلوامہ حملے سے متعلق سدھو کے ایک بیان نے بھارت میں ہنگامہ کھڑا کردیا تھا اور انتہاپسندہندوؤں نے ان کے خلاف مظاہرے شروع کردیے تھے جس کے بعد سدھو کو کامیڈی شو سے نکالنے کا بھی مطالبہ کیا گیا، بصورت دیگر شو کے بائیکاٹ کی دھمکی دی گئی جب کہ ان کے خلاف ممبئی کی فلم سٹی میں بھی احتجاجی مظاہرہ کیا گیا۔
ہندو انتہا پسندوں کے احتجاج پرکامیڈی شو کی انتظامیہ نےگھٹنے ٹیکتے ہوئے سدھو کو شو سے علیحدہ کردیا تھا۔
سدھو کے بعد ان کی کرسی اداکارہ ارچنا پورن سنگھ نے سنبھالی اور اب تک وہ ہی کپل کے ساتھ شو میں شریک ہیں۔
