الو ارجن نے ' پشپا 2' کیلئے کتنا معاوضہ وصول کیا؟ جان کر حیران رہ جائیں گے

اگر یہ کہا جائے کہ بھارت کی ساؤتھ کی فلم انڈسٹری نے مقبولیت میں بالی وڈ کو پیچھے چھوڑ دیا ہے تو یہ کہنا غلط نہ ہوگا، فلم کا بجٹ ہویا پھر فلم کا باکس آفس بزنس، ساؤتھ کی فلموں نے بالی وڈ کی حکمرانی ختم کی ہے۔ 

مانا جاتا ہے کہ بالی وڈ میں اکشے کمار، سلمان خان اور شاہ رخ خان سب سے زیادہ معاوضہ لینے والے اداکار ہیں۔ 

اس دوڑ میں بھی ساؤتھ فلم انڈسٹری کے اداکاروں نے بالی وڈ کے بڑے ناموں کو بہت پیچھے چھوڑ دیا ہے۔  

باہو بلی اور پھر پشپا جیسی بلاک بسٹر فلموں نے باکس آفس پر بزنس کے سارے ریکارڈز توڑے ہی تھے اور ساتھ ہی ان میں کام کرنے والے اداکاروں نے بھی بھاری معاوضے لیے۔

بھارتی میڈیا رپورٹس کے مطابق ساؤتھ انڈین فلم انڈسٹری کے معروف سپر اسٹار الو ارجن بھارت کے سب سے زیادہ معاوضہ لینے والے اداکار بن گئے ہیں۔

ٹریک ٹالی وڈ کی ایک رپورٹ میں دعویٰ کیا گیا ہے کہ الو ارجن نے 'پشپا 2' کے لیے حیران کن طور پر 300 کروڑ بھارتی روپے معاوضہ لیا ہے۔

یہ معاوضہ بالی وڈ کے بڑے اداکاروں کی فلم کے بجٹ سے بھی زیادہ ہے۔

رپورٹ میں بتایا گیا ہے کہ اس سے قبل رجنی کانتھ نے فلم جیلر کے لیے 250 کروڑ روپے معاوضہ لیا تھا۔

الو ارجن کی فلم پشپا 2 کا ٹریلر جاری، چندگھنٹوں میں کروڑوں ویوز مل گئے

بھارتی میڈیا کے مطابق 5 دسمبر 2024 کو فلم سنیما گھروں کی زینت بنےگی

دوسری جانب بالی وڈ کی بات کریں تو بھارتی میڈیا کی ایک رپورٹ میں بتایا گیا کہ  شاہ رخ خان اور سلمان خان فلموں کے منافع میں سےحصے سمیت150 سے 200 کروڑ روپے ایک فلم کا معاوضہ لیتے ہیں۔

واضح رہے کہ 17 نومبر کو الو ارجن کی فلم پشپا 2 کا ٹریلر جاری کیا گیا تھا، یوٹیوب پر 'پشپا 2- دی رول' کے تیلگو، ہندی اور تامل زبان میں جاری کیےگئے ٹریلرکو چندگھنٹوں میں ہی کروڑوں ویوز ملے۔

بھارتی میڈیا کے مطابق  پشپا2 اگلے ماہ 5 دسمبر کو سنیما گھروں کی زینت بنےگی۔