فلم ’ انداز اپنا اپنا ‘ میں کون سی بات عامر اور سلمان کے درمیان تناؤ کی وجہ بنی؟

بالی وڈ کی بہترین کامیڈی فلموں میں شامل فلم ’ انداز اپنا اپنا‘کو ریلیز ہوئے 30 سال کا عرصہ گزر چکا ہے لیکن ناظرین آج بھی اس فلم کے مرکزی کرداروں کی جاندار اداکاری کو یاد کرتے ہیں۔

اسی فلم کے حوالے سے سلمان خان کا 1992  میں دیا گیا  ایک انٹرویو بھارتی میڈیا پر شیئر کیا گیا ہے جس میں انہوں نے  فلم’ انداز اپنا اپنا  ‘کو اس وقت کی سب سے بڑی کامیڈی فلم قرار دیتے ہوئے فلم کی شوٹنگ کے دوران کے واقعات سے پردہ اٹھایا تھا۔ 

سلمان خان نے بتایا تھا کہ  فلم میں  ’عامر خان کا کردار مزاحیہ اور باتونی تھا جس میں تمام مضحکہ خیز ڈائیلاگز تھے میرا کردار’ ڈمبو‘   شخص کا تھا جسے میں نے ناقابل یقین حد تک نبھایا‘۔

دوران انٹرویو سلمان خان  نے یہ اعتراف  کیا  تھا کہ میں  نے فلم ’  انداز اپنا اپنا‘  کی شوٹنگ کے دوران  جان بوجھ کر فلم کے تسلسل کو توڑنے کی کوشش کی تاکہ اس میں تاخیر ہوسکے،  فلم  کو ریلیز ہونے میں 6 ماہ کا عرصہ تھا اس کے باوجود  میں فلم کو Delay کرنے کی سرتوڑ کوشش کررہا تھا،  میں انہیں تاریخیں دے رہا تھا  اور اپنی ٹوٹی ہوئی ٹانگ سے  ہراساں  کررہا تھا، میں نے اپنے بال چھوٹے کر لیے تھے لہٰذا  فلم کی شوٹنگ کا  تسلسل ختم ہوگیا‘۔

دونوں خانز کے درمیان  تناؤ کی وجہ کیا تھی؟

دوسری جانب فلم کی ریلیز کے بعد بہت سی افواہیں بھی  سامنے آئی تھیں جس میں کہا گیا کہ عامر اور سلمان اب ایک دوسرے کے ساتھ کام نہیں کریں گے، اسی دوران   فلم میں’ بھالا‘ کا کردار نبھانے والے  اداکار شہزاد خان نے  بھی اپنے ایک انٹرویو میں عامر اور سلمان خان کے درمیان ہونے والی لڑائی  کا ذکر کیا تھا۔

شہزاد خان نے بتایا  تھا کہ  ’میں نے کئی بار اپنی آنکھوں کے سامنے لڑائی ہوتے دیکھی جس میں کہا جاتا تھا کہ سلمان سلمان ہے اور عامر عامر ہے، اس لڑائی کے دوران  اکثر میں ان کے درمیان پُل  بن جاتا تھا،  میں بچپن سے ہی سلمان کے بہت  نزدیک  ہوں لہٰذا چیزیں سلجھ جاتی تھیں‘۔

شہزاد خان نے بتایا تھا کہ عامر اور سلمان کا اپنے کام کے حوالے سے مختلف نقطہ نظر تھا اور بظاہر یہی چیز ان کے درمیان کشیدگی کی وجہ بنی، عامر صبح سویرے شوٹنگ کیلئے پہنچ جاتے تھے جب کہ سلمان کو شوٹنگ کیلئے آتے آتے 10سے 11  بج جاتے،فلم کی پروڈکشن مرکزی اداکاروں کے درمیان مسائل سے دوچار تھی۔

یاد رہے  کہ فلم انداز اپنا اپنا  کی اسٹار کاسٹ عامر خان، سلمان خان، روینہ ٹنڈن اور کرشمہ کپور  پر مشتمل تھی جب کہ فلم  4 نومبر 1994 کو سینما گھروں کی زینت بنی تھی۔