24 نومبر ، 2024 
’بیروت کے بدلے تل ابیب‘، حزب اللہ دن بھر اسرائیل پر راکٹ برساتی رہی
24 نومبر ، 2024
گزشتہ روز لبنانی دارالحکومت بیروت پر اسرائیلی فضائی حملوں کے جواب میں آج صبح سے اسرائیلی دارالحکومت تل ابیب سمیت شمالی و وسطی اسرائیل حزب اللہ کے راکٹ حملوں کی زد میں ہے۔
عرب میڈیا کے مطابق آج صبح سے ہی حیفا، نھاریا اور دار الحکومت تل ابیب سمیت شمالی اور وسطی اسرائیل کے علاقوں پر حزب اللہ راکٹ برساتی رہی۔
آج حزب اللہ کی جانب سے سماجی رابطے کے پلیٹ فارم ٹیلی گرام پر ایک پوسٹر بھی جاری کیا گیا جس میں کہا گیا تھا کہ ’بیروت کے بدلے تل ابیب‘۔
اسرائیلی میڈیا کے مطابق صبح سے اب تک اسرائیل میں 500 مرتبہ سے زائد راکٹ حملوں سے خبردار کرنے والے سائرن بج چکے ہیں۔
حزب اللہ کے راکٹ حملوں کے نتیجے میں صبح سے اب تک 40 لاکھ سے زائد اسرائیلی میزائل شلیٹرز میں پناہ لے چکے ہیں۔
اسرائیلی میڈیا کے مطابق صبح سے اب تک حزب اللہ کی جانب سے 40 سے زائد حملے کیے جاچکے ہیں، جن میں حزب اللہ نے مجموعی طور پر 300 سے زائد رکٹ اور میزائل اسرائیل پر داغے جبکہ لبنان کی سرحد کے اندر کارروائی کرنے والے اسرائیلی فوجیوں پر بھی راکٹ داغے گئے۔
خیال رہے کہ گزشتہ دنوں حزب اللہ کے سربراہ نعیم قاسم نے اپنے خطاب میں کہا تھا کہ بیروت پر حملوں کے بعد اسرائیل کو تل ابیب پر حملوں کے لیے تیار رہنا چاہیے۔
مزید خبریں :
دبئی میں لاپتہ اسرائیلی مذہبی رہنما کی لاش مل گئی
3 گھنٹے پہلے
ایلون مسک کی دولت ریکارڈ 348 ارب ڈالرز تک پہنچ گئی
11 گھنٹے پہلے
