25 نومبر ، 2024 
’کہیں نہیں جا رہا نماز پڑھ کر پھر آتے ہیں‘، علی امین کی کارکنوں سے تکرار کی پرانی ویڈیو وائرل
25 نومبر ، 2024
خیبرپختونخوا کے وزیراعلیٰ علی امین گنڈاپور کی پاکستان تحریک انصاف کے احتجاج میں کارکنوں سے تکرار کی پرانی ویڈیو وائرل ہوگئی۔
سوشل میڈیا پر ایک ویڈیو وائرل ہے جس میں دیکھا جا سکتا ہے کہ پی ٹی آئی کارکنوں نے علی امین کی گاڑی کو گھیر رکھا ہے اور نعرے لگا رہے ہیں کہ اڈیالہ جانا ہے۔
اس موقع پر علی امین کا کہنا تھاکہ کہیں نہیں جا رہا ریسٹ ایریا میں جاکر وضو کرتے ہیں نماز پڑھتے ہیں پھر آتے ہیں۔
اس پر وہاں موجود کارکن بھی ان کی بات مان لیتے ہیں اور انہیں جانے کی اجازت دیتے ہیں۔
یہ ویڈیو تیزی سے سوشل میڈیا پر وائرل ہو رہی ہے تاہم جیو نیوز کے نمائندے نے ویڈیو کے پرانی ہونے کی تصدیق کی۔
جیو نیوز کے نمائندے مطابق سوشل میڈیا پر وائرل ہونے والی ویڈیو پرانی ہے اور یہ 4 اکتوبر کی ویڈیو ہے جو اب وائرل ہو رہی ہے۔
خیال رہے کہ خیبرپختونخوا کے وزیراعلیٰ علی امین گنڈاپور کی قیادت میں پی ٹی آئی کا قافلہ حضرو انٹرچینج تک پہنچا ہے، اس قافلے میں بشریٰ بی بی بھی شریک ہیں۔
