27 نومبر ، 2024 
کوہلی شادی سے قبل انوشکا کو دورہ آسٹریلیا پر ساتھ کیسے لیکر گئے؟ روی شاستری نے پول کھول دی
27 نومبر ، 2024
بھارتی ٹیم کے سابق ہیڈ کوچ روی شاستری نے حال ہی میں اسٹار بلے باز ویرات کوہلی اور ان کی اہلیہ اداکارہ انوشکا شرما کے حوالے سے ایک دلچسپ واقعہ بیان کیا ہے۔
غیر ملکی میڈیا سے بات کرتے ہوئے روی شاستری نے ویرات سے متعلق تقریباً 10 سال پرانا قصہ سنایا۔
انہوں نے کہا کہ '2015 میں جب میں بھارتی ٹیم کا کوچ تھا اس وقت انوشکا اور ویرات ایک دوسرے کو ڈیٹ کررہے تھے، ویرات میرے پاس آیا اور کہا کیا ٹور پر صرف بیویوں کو لانے کی اجازت ہے؟ گرل فرینڈ ساتھ نہیں آسکتی؟'
روی شاستری نے بتایا 'میں نے اجازت دی تو کوہلی نے کہا کہ بورڈ اجازت نہیں دے رہا، جس پر میں نے فون کیا اور اجازت مل گئی، پھر اس ٹور میں انوشکا ہمارے ساتھ تھی'۔
انہوں نے کہا 'آسٹریلیا کے خلاف پہلے ٹیسٹ میں ہی کوہلی نے 160 رنز اسکور کردیے جس کے بعد وہی ہوا، اسٹینڈ میں بیٹھی انوشکا کو ویرات نے فلائنگ کِس دی جو کہ اب اکثر میچز میں ہوتا ہے'۔
سابق ہیڈ کوچ نے کہا 'انوشکا ہمیشہ سے ہی ویرات کی سب سے بڑی سپورٹر رہی ہے'۔
واضح رہے کہ حال ہی میں پرتھ ٹیسٹ میں ویرات کوہلی نے آسٹریلیا کے خلاف زبردست سنچری اسکور کرکے پروفیشنل کرکٹ میں سنچریوں کی سنچری بنائی ہے۔
