عمران خان نے کہا لال مسجد سے بھی بڑا سانحہ کرایا گیا، عالمی سطح پر اٹھایا جائے: علیمہ خان

پاکستان تحریک انصاف کے بانی عمران خان کی ہمشیرہ علیمہ خان نے کہا ہے کہ عمران خان نے ہدایت کی کہ لال مسجد سے بھی بڑا سانحہ کرایا گیا جو سانحہ ہوا اس کو مقامی اور عالمی سطح پر اٹھایا جائے۔

راولپنڈی کی اڈیالا جیل کے باہر گفتگو میں علیمہ خان کا کہنا تھاکہ بانی پی ٹی آئی نے کہا کہ وہ اپنا آخری کارڈ ابھی نہیں بتائیں گے، گزشتہ روز بانی پی ٹی آئی سے ملنے نہیں دیا گیا اور 6 گھنٹے انتظارکیا،  آج بھی جیل سے پیچھے روکا گیا آنے نہیں دیا جارہا تھا۔

انہوں نے کہ بانی پی ٹی آئی کی صحت بالکل ٹھیک ہے، ان کے اخبارات بند ہیں، ٹی وی کی سہولت بھی نہیں، بانی پی ٹی آئی کو آج اور کل وکلا سے معلومات ملیں، ہم نے بھی ان کو سانحہ سے آگاہ کیا جس پر وہ صدمےمیں تھے۔

علیمہ خان کا کہنا تھاکہ لواحقین اپنے رشتہ داروں کو جیلوں میں ڈھونڈتے پھر رہے ہیں، عمران خان نے کہا شہدا اور گرفتار لوگوں کا پتا کرایا جارہا ہے اور انہوں نے محسن نقوی ور شہباز شریف کے خلاف ایف آئی آرکی ہدایت کی۔

عمران کو 12پی ٹی آئی شہدا کا بتایا جو سیکڑوں شہادتیں کہہ رہے ہم ان سے اعلان لاتعلقی کرتے ہیں: بیرسٹرگوہر

بانی کو مظاہرے اور دیگرمعاملات پرمعلومات فراہم کی، بانی کو کوئی پتا نہیں تھا کہ کیا ہوا ہے، انکی صحت اور اڈیالا میں نہ ہونے سے متعلق خبریں بھی غلط ہیں: پی ٹی آئی چیئرمین

انہوں نے بتایاکہ بانی پی ٹی آئی نے کہا کہ لال مسجد سے بھی بڑا سانحہ کرایا گیا ہے، اب جو واقعہ ہوا اس سے عوامی غصہ مزید بڑھے گا جو سانحہ ہوا اس کومقامی اور عالمی سطح پر اٹھایا جائے۔

علیمہ خان نے کہا کہ بشریٰ بی بی نے لوگوں کو لیڈ کیا باقی قیادت کو بھی کنٹینر پر ہونا چاہیےتھا، سوال یہ پوچھا جانا چاہیے کہ گولی کیوں چلی؟

خیال رہے کہ 26 نومبر کو سکیورٹی فورسز نے اسلام آباد مظاہرین سے خالی کرایا، آپریشن شروع ہوتے ہی وزیراعلیٰ کے پی علی امین گنڈا پور اور بشریٰ بی بی موقع سے فرار ہوگئیں تھیں اور کارکن بھی بھاگ نکلے تھے۔ پولیس نے سیکڑوں مظاہرین کو گرفتار کیا تھا۔

علی امین اور بشریٰ بی بی اسلام آباد سے فرار کے بعد مانسہرہ چلے گئے تھے۔

پی ٹی آئی رہنماؤں کی جانب سے کارکنوں کے جاں بحق ہونے کے متضاد دعوے کیے گئے تھے۔ لطیف کھوسہ نے 278 کا دعویٰ کیا تھا بعد ازاں پی ٹی آئی سیکرٹری اطلاعات شیخ وقاص اکرم نے 12 کارکنوں کے نام بتائے تھے۔

تاہم گزشتہ روز پی ٹی آئی چیئرمین بیرسٹر گوہر نے سیکروں شہادتوں کے دعوے سے لاتعلقی کا اعلان کیا اور کہا تھا کہ عمران خان کو پی ٹی آئی کے 12 شہدا کا بتایا۔