04 دسمبر ، 2024 
پاکستان
درخواست غیرضروری قرار، عدالت نے عمران خان کی بہنوں پر 10 ہزار روپے جرمانہ عائد کردیا
04 دسمبر ، 2024
انسداد دہشت گردی عدالت راولپنڈی نے پاکستان تحریک انصاف کے بانی عمران خان کی بہنوں علیمہ خان، عظمیٰ خان اور نورین نیازی پر 10 ہزار روپے جرمانہ کردیا۔
انسداد دہشتگردی عدالت راولپنڈی میں تینوں بہنوں نے 3 دسمبر کو بانی پی ٹی آئی سے ملاقات کی درخواست دائر کی تھی۔ انسداد دہشت گردی کی عدالت کے جج امجد علی شاہ نے درخواست پرسماعت کی۔
عدالت نے بانی پی ٹی آئی کی بہنوں کی طرف سے دائردرخواست پرجیل حکام سے جواب طلب کیا۔
جیل حکام نے عدالت کو بتایا کہ تینوں بہنوں کی ملاقات 3 دسمبرکو ہی کرائی گئی۔
جیل حکام کی رپورٹ پرعدالت نے درخواست غیرضروری قرار دیتے ہوئے تینوں پر 10 ہزار روپے جرمانہ عائد کردیا اور درخواست خارج کردی۔
