05 دسمبر ، 2024 
چیمپئنز ٹرافی: پی سی بی کا تمام معاملات ہوسٹ ایگریمنٹ میں شامل کرنے پر اصرار
05 دسمبر ، 2024
پاکستان کرکٹ بورڈ (پی سی بی) نے آئی سی سی چیمپئنز ٹرافی کے معاملے پر پاکستان اور بھارت کے درمیان طے معاملات کو ہوسٹ ایگریمینٹ میں درج کرنےکا مطالبہ کیا ہے۔
ذرائع کے مطابق پاکستان کرکٹ بورڈ کا تمام معاملات ہوسٹ ایگریمنٹ میں شامل کرنے پر اصرار ہے۔
ذرائع کے مطابق پی سی بی کا مطالبہ ہےکہ پاکستان اور بھارت کے درمیان طے معاملات کو ہوسٹ ایگریمینٹ میں درج کیا جائے۔ آئی سی سی کے ایونٹس کے معاملات میں پاکستان اور بھارت کے معاملات آئی سی سی کے فورم پر ہی طے ہوں، آئی سی سی کے فورم پر ہونے والے معاملات کی پابندی ممبر بورڈز پر لازمی ہوگی۔
بھارتی میڈیا کے مطابق بی سی سی آئی نے پاکستان کرکٹ بورڈ کا مطالبہ تسلیم کرلیا ہے۔
بھارتی میڈیا کے مطابق 2027 تک بھارت میں ہونے والے آئی سی سی ایونٹس میں پاکستان کوئی بھی میچ بھارت میں نہیں کھیلےگا، چیمپئنز ٹرافی میں بھارت اور 2026 کے ٹی ٹوئنٹی ورلڈکپ میں پاکستان اپنے میچز نیوٹرل وینیو پر کھیلےگا۔
بھارتی میڈیا کے دعوے پر آئی سی سی ، بی سی سی آئی اور پی سی بی نے کوئی ردعمل نہیں دیا ہے۔
