بارڈر گواسکر ٹرافی: بھارتی بیٹر جیسوال کو اسٹارک کیخلاف لفظی گولہ باری مہنگی پڑگئی

بارڈر گواسکر ٹرافی میں بھارتی بیٹر یشسوی جیسوال کو  آسٹریلوی بولر مچل اسٹارک کے خلاف لفظی گولہ باری مہنگی پڑگئی۔

بھارت اور آسٹریلیا کے درمیان بارڈر گواسکر ٹرافی کا دوسرا ٹیسٹ میچ ایڈیلیڈ میں کھیلا جارہا ہے۔اس ٹیسٹ کی خاص بات یہ ہے کہ یہ ڈے نائٹ ٹیسٹ ہے اور اس میں گلابی گیند کا استعمال ہورہا ہے۔

بھارت نے آسٹریلیا کو پہلے ٹیسٹ میں شکست دے کر پیغام دیا تھا کہ یہ سیریز میزبان کینگروز کے لیے آسان نہیں ہوگی۔

لیکن پہلے ٹیسٹ میں آسٹریلوی بولر مچل اسٹارک کو آنکھیں دکھانے والے بھارتی بیٹر جیسوال کو دوسرے ٹیسٹ میں منہ کی کھانی پڑ گئی۔

ہوا کچھ یوں کہ پرتھ میں کھیلے گئے پہلے ٹیسٹ میں بھارتی ٹیم دوسری اننگز میں مستحکم پوزیشن پر تھی، جیسوال نے شاندار 161 رنز کی اننگز کھیلی۔

اس اننگز کے دوران جیسوال نے اسٹارک کو چھیڑتے ہوئے کہا کہ' آپ کی گیند بہت آہستہ آرہی ہے'، یہ الفاظ اسٹمپ مائیک کے ذریعے ناظرین نے بھی سنے۔

کسی بھی فاسٹ بولر کے لیے یہ الفاظ ہضم کرنا مشکل ہوگا کہ کوئی اسے بولے کہ اس کی گیند آہستہ آرہی ہے، البتہ اسٹارک نے بظاہر جیسوال کی بات کو مسکرا کر نظر انداز کیا۔

جیسوال کے ایگریشن کو بھارتی شائقین کی جانب سے کافی پسند کیا گیا کہ کینگروز جو میدان میں لفظی گولا باری کیلئے مشہور ہیں انہیں بھارتی بیٹر نے ان کے ہی میدان پر آنکھیں دکھائیں۔

تاہم پہلا ٹیسٹ آسٹریلیا کی شکست کے ساتھ ختم ہوا،  لیکن اب ایڈیلیڈ میں کھیلے جارہے سیریز کے دوسرے  ٹیسٹ میں اسٹارک نے جیسوال کی بولتی بند کرا دی۔

دوسرے ٹیسٹ کے پہلے دن بھارت نے آسٹریلیا کے خلاف پہلے بیٹنگ کرنے کا فیصلہ کیا۔

تو بھارتی اننگز کی پہلی ہی گیند پر ہی اسٹارک نے یشسوی جیسوال کو اپنی بہترین گیند سے صفر پر ایل بی ڈبلیو آؤٹ کرکے پویلین بھیجا جبکہ پوری  بھارتی ٹیم 180 رنز بناکر آؤٹ ہوگئی۔

سوشل میڈیا پر جیسوال کو کافی ٹرول جبکہ اسٹاک کی تعریف کی جارہی ہے کہ انہوں نے اپنے کھیل سے بھارتی بیٹر کا منہ بند کروا دیا اور کسی بھی بولر کا سب سے بہترین بدلہ یہ ہوتا ہے کہ وہ بیٹر کی وکٹ لے جو کہ اسٹارک نے کیا۔

اسٹارک نے بھارت کے خلاف دوسرے ٹیسٹ میں پہلی اننگز میں 6 وکٹیں حاصل کیں۔

پہلے ٹیسٹ کے بعد ایک انٹرویو میں اسٹارک نے جیسوال کے حوالے سے بات کرتے ہوئے کہا تھا کہ مجھے سنائی ہی نہیں دیا کہ اس نے کیا کہا،ہاں ماضی میں ، میں فیلڈ پر کافی بولتا تھا پر میں آج کل زیادہ بات نہیں کرتا۔ 

وا  ضح رہے کہ بھارت کو 5 ٹیسٹ میچز کی سیریز میں ایک صفر کی برتری حاصل ہے۔