دنیا

بھارت میں طالبعلموں کی امتحان کینسل کروانے کیلئے اسکول کو بم سے اڑانے کی دھمکی

22 دسمبر ، 2024

بھارت میں طالبعلموں کی امتحان کینسل کروانے کیلئے اسکول کو بم سے اڑانے کی دھمکی — گزشتہ دنوں اسکولوں کو بم سے اڑانے کی دھمکیوں میں سے 3 دھمکیاں اسکول میں پڑھنے والوں طلبہ کی جانب سے ملیں، پولیس/ فائل فوٹو

نئی دہلی: بھارت میں اسکولوں کو بم سے اڑانے کی دھمکیوں کے پیچھے شرپسندوں کے علاوہ اسکول طلبہ کے ملوث ہونے کا انکشاف ہوا ہے۔

بھارتی میڈیا کا بتانا ہے کہ دارالحکومت نئی دہلی میں کم از کم 3 اسکولوں کو دھمکی آمیز ای میلز (بم سے اڑانے کی دھمکی) بھیجنے کے پیچھے ان ہی اسکولوں میں پڑھنے والے طلبہ ملوث پائے گئے ہیں۔

رپورٹ کے مطابق گزشتہ دنوں جن اسکولوں کو بم سے اڑانے کی دھکمی آمیز ای میلز موصول ہوئیں ان میں سے ایک اسکول وینکٹیشور گلوبل اسکول بھی تھا جسے اسی اسکول میں پڑھنے والے دو بہن بھائیوں نے دھمکی آمیز ای میلز بھیجیں۔

پولیس کے مطابق دھمکی آمیز ای میلز اسی اسکول میں پڑھنے والے دو بہن بھائیوں نے اس لیے بھیجیں کیونکہ وہ چاہتے تھے کے ان کے امتحانات ملتوی (کینسل) ہو جائیں۔

حکام نے مطابق کونسلنگ سیشن کے دوران دونوں طلبہ نے انکشاف کیا کہ گزشتہ دنوں اسکولوں کو ملنے والی دھمکیوں کے بعد یہ کرنے کا آئیڈیا آیا جبکہ دونوں طلبہ کو سرزنش(وارننگ)کے بعد والدین کے ساتھ جانے کی اجازت دیدی گئی۔

بھارتی میڈیا کے مطابق بھارت میں مئی 2024 سے اب تک اسکولوں، اسپتالوں اور ائیرلائنز کو 50 سے زائد بم حملوں کی دھمکی ای میلز کے ذریعے بھیجی گئیں۔

پولیس کا بتانا ہے کہ دھمکی آمیز ای میلز بھیجنے والے اکثر افراد وی پی اینز استعمال کرتے ہیں جن سے ان کی لوکیشن معلوم کرنے میں مشکل پیش آتی ہے۔