بھارت میں کوسٹ گارڈ کا ہیلی کاپٹر گر کر تباہ، 3 اہلکار ہلاک

بھارتی ریاست گجرات میں کوسٹ گارڈ کا ہیلی کاپٹر گر کر تباہ ہو گیا جس کے نتیجے میں 3 اہلکار ہلاک ہو گئے۔

بھارتی میڈیا کے مطابق کوسٹ گارڈ کا ہیلی کاپٹر گجرات کے پورٹ بندر ائیرپورٹ پر گر کر تباہ ہوا جس کے نتیجے میں ہیلی کاپٹر میں سوار 3 افراد ہلاک ہو گئے۔

بھارتی پولیس کے مطابق کوسٹ گارڈ کا ایڈوانس لائٹ ہیلی کاپٹر معمول کی پرواز کے دوران گر کر تباہ ہوا، ہیلی کاپٹر میں سوار عملے کے 3 افراد کو شدید زخمی حالت میں ریسکیو کیا گیا۔

میڈیا رپورٹس کے مطابق تینوں زخمی اہلکاروں کو طبی امداد کے لیے اسپتال منتقل کیا گیا تاہم تینوں دوران علاج چل بسے۔

خیال رہے کہ دو ماہ قبل بھی بھارتی کوسٹ گارڈ کا ہیلی کاپٹر سمندر میں گر کر تباہ ہو گیا تھا۔