06 جنوری ، 2025 
ورلڈ ٹیسٹ چیمپئن شپ: آسٹریلوی فاسٹ بولر پیٹ کمنز نے اہم اعزاز حاصل کرلیا
06 جنوری ، 2025
آسٹریلوی کپتان پیٹ کمنز نے آئی سی سی ٹیسٹ چیمپئن شپ میں اہم اعزاز اپنے نام کرلیا۔
اتوار کو آسٹریلیا نے سڈنی ٹیسٹ میں بھارت کو شکست دیکر 5 میچوں پر مشتمل بارڈر گواسکر ٹرافی 1-3سے اپنے نام کر لی۔
آسٹریلیا نے بھارت کو سڈنی ٹیسٹ میں 6 وکٹوں سے شکست دےکر ورلڈ ٹیسٹ چیمپئن شپ کے فائنل کے لیے بھی کوالیفائی کر لیا ۔
بھارت کے خلاف سڈنی ٹیسٹ میں آسٹریلوی کپتان پیٹ کمنز نے اہم اعزاز بھی اپنے نام کرلیا۔
آسٹریلیا کے کپتان پیٹ کمنز آئی سی سی ورلڈ ٹیسٹ چیمپئن شپ میں 200 وکٹیں لینے والے پہلے بولر بن گئے ہیں۔
اتوار کو سڈنی ٹیسٹ میں بھارت کی دوسری اننگز میں بولنگ کرتے ہوئےکمنز نے واشنگٹن سندر کو آؤٹ کر کے اننگز کی تیسری وکٹ کے ساتھ یہ کارنامہ انجام دیا۔
پیٹ کمنز نے 2019 سے شروع ہونے والی آئی سی سی ورلڈ ٹیسٹ چیمپئن شپ کے47 میچز میں 200 وکٹوں کا سنگ میل عبور کیا ہے۔
اس فہرست میں دوسرا نمبر آسٹریلیا کے اسپنر نتھن لائن کا ہے، جنہوں نے ورلڈ ٹیسٹ چیمپئن شپ کے 48 میچز میں 196 وکٹیں حاصل کی ہیں۔
واضح رہے کہ آئی سی سی کی جانب سے 2019 میں ورلڈ ٹیسٹ چیمپئن شپ کا اعلان کیا گیا تھا اور 2021 میں ہونے والے پہلے فائنل میں نیوزی لینڈ نے بھارت کو شکست دی تھی جبکہ 2023 میں ہونے والے فائنل میں بھارت کو آسٹریلیا کے ہاتھوں شکست کا مزہ چکھنا پڑا تھا۔
تاہم اب جنوبی افریقا بھی ورلڈ ٹیسٹ چیمئن شپ کے لیے کوالیفائی کر چکا ہے، اس بار ورلڈ ٹیسٹ چیمپئن شپ کا فائنل آسٹریلیا اور جنوبی افریقا کے درمیان جون میں ہوگا۔
مزید خبریں :
صائم ایوب علاج کیلئے لندن روانہ
5 گھنٹے پہلے
