مسلم معاشروں میں لڑکیوں کی تعلیم، چیلنجز کے موضوع پر دو روزہ عالمی کانفرنس کا آغاز ہوگیا

اسلام آباد میں مسلم معاشروں میں لڑکیوں کی تعلیم، چیلنجز اور مواقع کے موضوع پر دو روزہ عالمی کانفرنس کا آغاز ہو گیا۔

لڑکیوں کی تعلیم سے متعلق دو روزہ بین الاقومی کانفرنس اسلام آباد میں شروع ہوگئی۔ کانفرنس میں 23 سے زائد ممالک کے مندوبین، ماہرین تعلیم، وزرا اور اسکولز کے نمائندے شریک ہیں۔ 

کانفرنس میں نوبیل انعام یافتہ ملالہ یوسف زئی بھی شرکت کر رہی ہیں۔

کانفرنس سے خطاب میں وزیر اعظم شہباز شریف نےکہا کہ حضرت محمد ﷺ کی تعلیمات کے مطابق صنفی امتیاز سے بالاتر تعلیم مرد اورعورت پرفرض ہے، حضرت خدیجہ کامیاب کاروباری خاتون تھیں، فاطمہ جناح قیام پاکستان کی تحریک میں اپنے بھائی کے شانہ بشانہ کھڑی ہوئیں۔

انہوں نے کہا کہ بینظیر بھٹو پہلی مسلمان خاتون وزیر اعظم بنیں، ملالہ ہمت اور بہادری کی علامت ہیں، مریم نوازپاکستان کی پہلی خاتون وزیر اعلیٰ بنیں۔

لڑکیوں کو تعلیم سے محروم کرنا، روشن مستقبل سے محروم کرنا ہے: وزیراعظم

پاکستان میں خواتین کی تعلیم کی راہ میں بڑے چیلنجز ہیں، اس مقصد کے لیے آواز اٹھانا اور وسائل مختص کرنا ہوں گے: شہباز شریف

انہوں نے کہا کہ پاکستان کے 2 کروڑ 28 لاکھ بچے اسکول سے باہر ہیں جن میں بڑی تعداد لڑکیوں کی ہے، بین الاقوامی اور پاکستانی تنظیمیں، مخیر افراد ہمارے ساتھ لڑکیوں کی تعلیم کے لیے کردار ادا کریں۔

ان کا کہنا تھاکہ آئندہ دنوں میں لاکھوں لڑکیاں نوکری کی مارکیٹ میں داخل ہوں گی۔

اسلام تعاون تنظیم کے سیکرٹری جنرل ڈاکٹر حسین ابراہیم طحہٰ اور مسلم ورلڈ لیگ کے چیئرمین شیخ ڈاکٹر محمد بن عبدالکریم العیسیٰ نے حصول تعلیم کو مسلم دنیا کی ترقی کا ستون قرار دیا۔ 

وفاقی وزیرتعلیم نے کہاکہ مسلم معاشروں میں لڑکیاں تعلیم کے بنیادی حق سے محروم ہیں۔

لیفٹیننٹ جنرل نگار جوہرنےکہا کہ لڑکیوں کے تباہ اسکولز دیکھے لیکن انہوں نے لڑکیوں کواپنے حق کےلیےکھڑےہوتے بھی دیکھا، خواتین کی تعلیم قومی بجٹ اور قومی پالیسی کی ترجیح ہونی چاہیے، فیصلہ سازی اور پالیسی سازی میں خواتین کو شامل کرنا ہو گا۔

لڑکیوں کی تعلیم سے متعلق کانفرنس کے اختتام پر "اسلام آباد اعلامیہ” بھی جاری کیاجائےگا جو اقوام متحدہ کوبھجوایا جائے گا۔