پنجاب کابینہ کا آسان کاروبار کیلئے مفت پلاٹ دینے، موٹرسائیکل کی اسپیڈ محدود کرنے کا اعلان

پنجاب کابینہ نے آسان کاروباراسکیم کیلئے مفت پلاٹ دینے کی منظوری دے دی۔

وزیراعلیٰ پنجاب مریم نوازشریف کی زیر صدارت صوبائی کابینہ کا 22 واں اجلاس ہوا جس میں ایجنڈا پوائنٹ زیر بحث لائے گئے۔ اجلاس میں آسان کاروبار فنانس اسکیم کی منظوری دی گئی اور ایک لاکھ بزنس سٹارٹ اپ کا ہدف بھی مقرر کیا گیا۔

کابینہ نے سی ایم پنجاب آسان کاروبار کارڈ کی منظوری دی اور  وزیر اعلیٰ نے آسان کاروبار سکیم کے لئے مفت اراضی دینے کااعلان کردیا، فیصلہ کیا گیا کہ 3کروڑ روپے تک بلا سود قرض دیا جائے گا۔

کابینہ نے ای وہیکلزچارجنگ اسٹیشن قائم کرنےکےلیے پالیسی طلب کرلی اور قذافی اسٹیڈیم کا نام تبدیل کرنے کا فیصلہ مسترد کردیا۔

کابینہ نے کسان کارڈ کی مالیت ساڑھے 7 لاکھ کرنے اور کیش لمٹ 30 فیصد تک بڑھانے کی منظوری بھی دی۔ 

پنجاب کابینہ نے قذافی اسٹیڈیم کا نام تبدیل کرنے کا فیصلہ مسترد کردیا

2022 میں کراچی کے نیشنل اسٹیڈیم کا نام تبدیل کر دیا گیا تھا

وزیر اعلیٰ کا کہناتھاکہ کسان کارڈ سے کاشتکاروں نے 46 ارب کی ریکارڈ خریداری کی ہے کسان رُل گیا ہے کا بیانیہ پٹ گیا ہے، اب کاشتکارخوش اور خوشحال ہے۔

صوبائی کابینہ نے اسپیشل اینیشیٹو فار ڈائیلسزپروگرام کی منظوری دی اور ڈائیلسز فنڈز 7 لاکھ سے بڑھا کر 10لاکھ کر دیا۔ کابینہ نے وہیکلز رجسٹریشن مہم شروع کرنے اور موٹرسائیکل کی اسپیڈ 60 کلومیٹرفی گھنٹہ تک محدود کرنے کا فیصلہ بھی کیا، 12ماہ کے بعدموٹر سائیکل کی انسپیکشن اور سرٹیفکیشن کیلئے ترمیم بھی منظور کی۔

کابینہ نے اوورسیز پاکستانیوں کے پراپرٹی کیسز کیلئےاسپیشل عدالت قائم کرنے اور جرنلسٹ سپورٹ فنڈ کی سیڈ منی اور مالی امداد بڑھانے کی منظوری بھی دی۔

اجلاس میں پراپرٹی ٹیکس، ویلیو ایشن سسٹم کو رینٹل ویلیو سے کیپٹل ویلیو پر منتقل کرنے کی منظوری بھی دی گئی۔