18 جنوری ، 2025 
دو دو تین تین دروازوں سے مذاکرات بیک وقت نہیں چلا کرتے: عرفان صدیقی کا پی ٹی آئی کو پیغام
18 جنوری ، 2025
اسلام آباد: حکومتی مذاکراتی ٹیم کے ترجمان عرفان صدیقی نے پی ٹی آئی چیئرمین کی آرمی چیف سے ملاقات پر بیرسٹر گوہر کو پیغام دیا ہےکہ دو دو تین تین دروازوں سے مذاکرات بیک وقت نہیں چلا کرتے۔
ایک بیان میں عرفان صدیقی نے کہاکہ مجھے بیرسٹر گوہر کی آرمی چیف سے ملاقات کی تفصیل اور مکالموں کا علم ہے، بیرسٹرگوہرنےکہا براہ راست اعلیٰ ترین فوجی سطح پربات شروع ہوگئی ہے جو اطمینان بخش ہے، بیرسٹر گوہر نے کہا کہ بیک ڈور پراسیس بھی چلے گا اور فرنٹ ڈور پراسیس بھی۔
عرفان صدیقی نے کہا کہ دو دو تین تین دروازوں سے مذاکرات بیک وقت نہیں چلا کرتے لہٰذا اب چھوٹے چھوٹے دروازوں، کھڑکیوں اور روشن دانوں میں جھانکنے کا کوئی فائدہ نہیں، اگر وہ دروازہ کھل گیا ہے جس کے لیے سال سے کوشاں تھے تو یہ کوشش چھوڑ دیں۔
انہوں نے مزید کہا کہ بانی پی ٹی آئی اور علیمہ خان بھی آرمی چیف سے بیرسٹرگوہر کی ملاقات کو خوش آئند قرار دے رہی ہیں۔
