29 جنوری ، 2025 
نوجوان کی محبت میں کراچی آئی امریکی خاتون واپس نہ جانے پر بضد، ائیرپورٹ سے نامعلوم مقام پر روانہ
29 جنوری ، 2025
کراچی: پاکستانی نوجوان کی محبت میں کراچی آئی امریکی خاتون ائیرپورٹ سے ٹیکسی میں بیٹھ کر نامعلوم مقام پر چلی گئی۔
ائیرپورٹ ذرائع کا بتانا ہے کہ امریکی قونصل خانےکی 2 رکنی ٹیم نے کراچی ائیرپورٹ پہنچ کر امریکی خاتون سے ملاقات کی اور ائیرپورٹ حکام سے بھی بات چیت کی تھی۔
ذرائع کے مطابق امریکی حکام نے اس موقع پر کہا کہ کوشش یہی ہےخاتون کو راضی کرکے امریکا واپس بھیجاجائے لیکن اگر خاتون نہ جانا چاہےتو زبردستی نہیں کرسکتے۔
ذرائع کا بتانا ہے کہ ائیرپورٹ حکام نے خاتون کو امریکی قونصل خانے کے حوالے کرنےکا فیصلہ کیا تھا مگر خاتون ائیرپورٹ سے ٹیکسی میں بیٹھ کر نامعلوم مقام پر چلی گئی اور پولیس کو کہا کہ اپنے شوہر کے پاس جا رہی ہوں۔
دوسری جانب پولیس کا کہنا ہے کہ امریکی خاتون نے قونصلیٹ کی ٹیم سے مدد لینے سے انکار کردیا اور وہ کسی کی مدد نہیں لینا چاہتی۔
ذرائع کے مطابق خاتون نے آج صبح امریکا واپسی کے لیے خلیجی ائیرلائن کی پرواز میں سوار ہونے سے انکارکردیا تھا۔
یاد رہے کہ امریکی خاتون اونیجا اینڈریو رابنس کراچی کے نوجوان کی محبت میں 11 اکتوبر کو یہاں پہنچی، خاتون کے 2 بچے ہیں جب کہ 19 سالہ نوجوان نے خاتون سے شادی کرنے سے انکار کردیا۔
امریکی خاتون کئی ماہ کراچی میں دربدر رہی اور پھر اس کی واپسی کا انتظام کیا گیا تھا تاہم خاتون نے جانے سے انکار کردیا۔
